అడ్వకేట్ జయారాం నేరేడు పంట నెల ముందుగా చేతికి; ఆన్‌లైన్ విక్రయాలతో లాభాల ఆశ

శ్రీ సత్యసాయి జిల్లా రామగిరి మండలం కుంటిమద్ది గ్రామానికి చెందిన అడ్వకేట్ జయరామ రెడ్డి 18 ఎకరాల్లో నేరేడు, మామిడి తోటలు సాగు చేస్తున్నారు. ఆయన తండ్రి 2011లో నాటిన 650 చెట్లతో ఈ తోట ఏర్పాటైంది. సాధారణంగా జూన్-జూలైలో దిగుబడి వచ్చే నేరేడు పంట ఈసారి మే నెలలోనే ప్రారంభమైంది.

అనుకూల వాతావరణం, సరైన యాజమాన్య పద్ధతుల కారణంగా ఈ ముందస్తు దిగుబడి సాధ్యమైందని జయరామ రెడ్డి తెలిపారు. ఒకేసారి పిందె, కాయ పెరుగుదల, కోత దశల్లో పండ్లు లభిస్తుండడంతో విడతల వారీగా దిగుబడి అందుతోంది. దీనివల్ల మార్కెట్‌కు నిరంతరం సరఫరా చేసే అవకాశం ఉందని ఆయన అన్నారు.

స్థానిక మార్కెట్ సౌకర్యం లేకపోవడంతో పంటను హైదరాబాద్, బెంగళూరు తదితర నగరాలకు తరలించేందుకు రవాణా ఖర్చులు భారీగా పడుతున్నాయని రైతు వివరించారు. గత ఏడాది 60–70 టన్నుల పంట వచ్చినా, మార్కెటింగ్ సౌకర్యం లేక లాభాలు పొందలేకపోయామని ఆయన చెప్పారు. ఈసారి స్విగ్గీ ఇన్‌స్టామార్ట్, జొమాటో ద్వారా విక్రయాలు ప్రారంభించారు. ప్రస్తుతం కేజీ రూ.200 చొప్పున ఈ కంపెనీలకు సరఫరా చేస్తుండగా, స్థానికంగా కేజీ ధర రూ.70–80 మాత్రమే లభిస్తోంది. ఈ ఏడాది నిర్వహణకు సుమారు రూ.12 లక్షలు ఖర్చు చేశానని, మార్కెట్ స్థిరంగా ఉంటే పెట్టుబడి తిరిగి వచ్చే అవకాశం ఉందని జయరామ రెడ్డి ఆశాభావం వ్యక్తం చేశారు.

నేరేడు, మామిడి, జామ, సీతాఫలం వంటి పండ్లకు ఈ ప్రాంతంలో మంచి డిమాండ్ ఉన్నా, ప్రాసెసింగ్ యూనిట్లు లేక రైతులు నష్టపోతున్నారని ఆయన సూచించారు. ప్రభుత్వం పండ్ల ప్రాసెసింగ్ సౌకర్యాలు ఏర్పాటు చేస్తే గ్రామీణాభివృద్ధికి కూడా దోహదపడుతుందని అభిప్రాయపడుతున్నారు.