జయశంకర్ వ్యవసాయ విశ్వవిద్యాలయంలో విత్తన వారోత్సవాలు ప్రారంభం

రాజేంద్రనగర్‌లోని ప్రొఫెసర్ జయశంకర్ తెలంగాణ రాష్ట్ర వ్యవసాయ విశ్వవిద్యాలయంలో శనివారం విత్తన వారోత్సవాలు ప్రారంభమయ్యాయి. వ్యవసాయ శాఖ మంత్రి తుమ్మల నాగేశ్వరరావు ఈ కార్యక్రమాన్ని ప్రారంభించారు.

ఈ నెల 23 నుంచి 30వ తేదీ వరకు విత్తన వారోత్సవాలు జరగనున్నాయి. జయశంకర్ వ్యవసాయ విశ్వవిద్యాలయం ఆధ్వర్యంలో దాదాపు 1,231 మెట్రిక్ టన్నుల విత్తనాలు సరసమైన ధరలకు రైతులకు అందించనున్నారు. వరి సహా 550కి పైగా రకాల విత్తనాలు అందుబాటులో ఉంటాయి.

ఈ విత్తనాలు పొందాలనుకున్న రైతులు జిల్లాల్లోని వ్యవసాయ పరిశోధన కేంద్రాలు మరియు కృషి విజ్ఞాన కేంద్రాలను సంప్రదించవచ్చు. ఈ ఏడాది 2 లక్షల మంది రైతులకు విత్తనాలు అందించాలని విశ్వవిద్యాలయం లక్ష్యంగా పెట్టుకుంది.

గత సంవత్సరం 33,000 మంది రైతులకు ఉచితంగా విత్తనాలు అందించారు. వారిలో 1,100 గ్రామాల్లోని 8,000 మంది రైతులు ఆ విత్తనాల నుంచి వచ్చిన దిగుబడిని తోటి రైతులకు పంచారు. ఆ విత్తనాల ద్వారా వచ్చిన దిగుబడి 6 లక్షల ఎకరాల్లో సాగైంది.

ఖరీఫ్ సీజన్ సమీపిస్తున్న నేపథ్యంలో మార్కెట్‌లో నాసిరకం విత్తనాలతో రైతులు నష్టపోతున్న సమస్యను దృష్టిలో పెట్టుకుని వ్యవసాయ శాఖ మరియు విశ్వవిద్యాలయం సంయుక్తంగా ఈ మేళాను నిర్వహిస్తున్నాయి.