జేవర్ విమానాశ్రయం ప్రారంభం.. ఏషియాలోనే అతిపెద్దదిగా మారనుంది: మంత్రి రామ్మోహన్ నాయుడు

ఉత్తరప్రదేశ్‌లోని జేవర్‌లో నిర్మించిన నోయిడా ఇంటర్నేషనల్ ఎయిర్‌పోర్ట్ (జేవర్ ఎయిర్‌పోర్ట్) శనివారం తొలి విమాన సర్వీసుతో కార్యకలాపాలు ప్రారంభించింది. ఈ సందర్భంగా ఏర్పాటు చేసిన కార్యక్రమంలో కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు మాట్లాడుతూ, ఇది కేవలం మరో విమానాశ్రయం కాదని, దేశీయ, అంతర్జాతీయ సర్వీసులకు కీలక హబ్‌గా మారుతుందని అన్నారు. ఏషియాలోనే అతిపెద్ద విమానాశ్రయాల్లో ఇది ఒకటిగా నిలుస్తుందని చెప్పారు.

జేవర్ ఎయిర్‌పోర్ట్ ఏరోట్రోపోలిస్ మోడల్‌ను అనుసరిస్తోందని, ఇక్కడ మాన్యుఫాక్చరింగ్, హాస్పిటాలిటీ, వ్యవసాయం, కార్గో వంటి బహుళ రంగాలు విమానాశ్రయంపై ఆధారపడి అభివృద్ధి చెందుతాయని మంత్రి వివరించారు. ఈ ప్రాజెక్టు ప్రారంభ దశలో ఏడాదికి 1.2 కోట్ల మంది ప్రయాణికుల సామర్థ్యంతో మొదలవుతుందని, ఆ తర్వాత టెర్మినల్ విస్తరణ చేపట్టి, దశలవారీగా నాలుగో దశ నాటికి సంవత్సరానికి 7 కోట్ల మంది ప్రయాణికులను నిర్వహించే స్థాయికి చేరుకుంటుందని తెలిపారు.

ప్రధాని నరేంద్ర మోదీ చేతుల మీదుగా గతంలో ఇక్కడ ఎంఆర్వో (మెయింటెనెన్స్, రిపేర్, ఓవర్‌హాల్) కేంద్రానికి శంకుస్థాపన జరిగినట్లు ఆయన గుర్తు చేశారు. ఆంధ్రప్రదేశ్‌కు చెందిన ఎంపీ అయిన రామ్మోహన్ నాయుడు, ఈ ఎయిర్‌పోర్ట్‌తో ఢిల్లీ ఐజీఐ ఎయిర్‌పోర్ట్‌పై ఒత్తిడి తగ్గడంతోపాటు, ఉత్తర భారతంలో పారిశ్రామిక, వాణిజ్య కార్యకలాపాలు వేగంగా అభివృద్ధి చెందుతాయని అభిప్రాయపడ్డారు. నిర్మాణంలో ఎదురైన ఆలస్యాన్ని ప్రస్తావిస్తూ, ఇక ఎలాంటి జాప్యం లేకుండా పనులు శరవేగంగా సాగుతాయని ఆయన విశ్వాసం వ్యక్తం చేశారు.