జ్ఞానేశ్వరి కేసులో కీలక ఆధారం కుక్క మృతి; దర్యాప్తుకు ఎదురుదెబ్బ

కాకినాడ జిల్లా తుని మండలంలో రెండేళ్ల చిన్నారి జ్ఞానేశ్వరి అదృశ్యమైన కేసులో నూతన పరిణామం చోటు చేసుకుంది. ఆమెతో పాటు తప్పిపోయిన పెంపుడు కుక్క శనివారం మృతి చెందింది. దీంతో చిన్నారి జాడ కనుగొనడంలో పోలీసులు ఒక కీలకమైన ఆధారాన్ని కోల్పోయారు.

జ్ఞానేశ్వరి ఈ నెల 6న తుని మండలం దొండవాక పంచాయతీ ‘సీహెచ్ అగ్రహారం’ నుంచి తప్పిపోయింది. అప్పుడు ఆ కుక్క కూడా ఆమె వెంటే ఉంది. నాలుగు రోజుల తర్వాత ఇంటికి తిరిగివచ్చిన కుక్కను గుర్తించి పోలీసులు దాని మెడకు జీపీఎస్ ట్రాకర్ అమర్చి వదిలారు. ఆ ట్రాకర్ డేటా ప్రకారం 24 గంటల్లో 90 నిమిషాల పాటు సుమారు 10.5 కి.మీ. తోట గ్రామ పరిధిలో తిరిగి తిరిగి నివాసానికి చేరుకుంది. అయితే ఆ మార్గాల్లో బాలిక జాడ లభించలేదు. ఐదు నెలల వయసున్న ఆ కుక్క అనారోగ్యంతో ఆహారం తీసుకోకుండా ఇంటి వద్దే కుప్పకూలి మృతి చెందడంతో దర్యాప్తు మరింత క్లిష్టంగా మారింది.

కేసు పురోగతిపై ఐజీ అశోక్ కుమార్, జిల్లా ఎస్పీ బిందు మాధవ ఆధ్వర్యంలో దర్యాప్తు బృందాలతో టెలీ కాన్ఫరెన్స్ నిర్వహించారు. గ్రామ పరిసరాల్లోని 7 సెల్ టవర్ల పరిధిలోని ఫోన్ కాల్స్ విశ్లేషించగా 100 నంబర్లు అనుమానాస్పదంగా తేలాయి. వాటి ఆధారంగా నర్సీపట్నం ఏజెన్సీ ప్రాంతాలకు పోలీసు బృందాలు వెళ్లాయి. చిన్నారిని చూశానని చెప్పిన ఒక వ్యక్తి వాంగ్మూలం కూడా రికార్డు చేశారు. మృత కుక్కకు పోస్ట్‌మార్టం నిర్వహించి మరణ కారణం తెలుసుకునే ప్రయత్నం చేస్తున్నారు.

ఇలాంటి సంక్లిష్టమైన కేసులో నైపుణ్యం ఉన్న అధికారులను రంగంలోకి దించాలని ఉప ముఖ్యమంత్రి పవన్ కళ్యాణ్ కాకినాడ ఎస్పీకి ఫోన్‌లో సూచించారు. ప్రస్తుతం గాలింపు చర్యల్లో ఉన్న ఎస్‌డీఆర్‌ఎఫ్, పోలీసు బృందాలతో పాటు ఎన్‌డీఆర్‌ఎఫ్ సేవలు ఉపయోగించుకోవాలని, దట్టమైన అడవుల్లోకి వెళ్లగల నిపుణుల సహాయంతో పరిసర ప్రాంతాల్లో జల్లెడ పట్టాలని ఆదేశించారు.