విద్యార్థులపై ఎఫ్ఐఆర్ల ఉపసంహరణకు కేంద్రం హామీ: సమావేశం తర్వాత సిజెపి ప్రకటన

డిల్లీలోని కాన్స్టిట్యూషన్ క్లబ్‌లో కేంద్ర మంత్రులు జేపి నడ్డ, జితేంద్ర సింగ్‌తో సిజెపి ప్రతినిధులు సమావేశమయ్యారు. ఈ సమావేశంలో విద్యార్థులు, నిరసనకారులపై నమోదైన ఎఫ్ఐఆర్‌లను ఉపసంహరించుకోవడంతోపాటు మృతుల కుటుంబాలకు కోటి రూపాయల పరిహారం ఇవ్వాలనే డిమాండ్లపై చర్చించారు.

సిజెపి ప్రతినిధులు చెప్పిన వివరాల ప్రకారం, తమ ప్రధాన డిమాండ్ అయిన కేంద్ర మంత్రి ధర్మేంద్ర ప్రధాన్ రాజీనామాను సాధించామని, అన్ని బిజెపి పాలిత రాష్ట్రాల్లో నిరసనకారులపై ఎఫ్ఐఆర్‌లు ఉపసంహరించుకుంటామని ప్రభుత్వం హామీ ఇచ్చిందని తెలిపారు. మృతుల కుటుంబాలకు కోటి రూపాయల చొప్పున పరిహారం ఇస్తామని కూడా హామీ లభించినట్లు వారు వెల్లడించారు.

కేంద్ర మంత్రి జేపి నడ్డ మాట్లాడుతూ, సిజెపి డిమాండ్లను పరిగణనలోకి తీసుకుంటామని, నష్టపరిహారం నియమ నిబంధనల ప్రకారమే ఉంటుందని చెప్పారు. ఈ చర్చలు కొనసాగే సమయంలో ప్రదర్శనకారులపై ఎలాంటి చర్యలు తీసుకోబోమని హామీ ఇచ్చారు. విద్యా సంస్కరణలపై సిజెపి సూచించిన ఐదు అంశాలతో కూడిన పత్రాన్ని అందుకున్నట్లు నడ్డ తెలిపారు. నాలుగు వారాల్లో మరోసారి సమావేశమయ్యేందుకు రెండు వైపులా అంగీకారం కుదిరింది.

ఈ సమావేశం తర్వాత జంతర్ మంతర్‌లో కొనసాగుతున్న ఆందోళనను నిలిపివేస్తున్నట్లు సిజెపి నేతలు ప్రకటించారు. ఢిల్లీ పోలీసులు కూడా లౌడ్ స్పీకర్ల ద్వారా నిరసనకారులను ఇళ్లకు వెళ్లాలని సూచించారు.