జూనియర్ ఎన్టీఆర్ రాజకీయ ప్రవేశంపై వచ్చిన వార్తలు ఫేక్: ఫ్యాన్స్ అసోసియేషన్ ఖండన

నటుడు జూనియర్ ఎన్టీఆర్ రాజకీయ రంగ ప్రవేశం చేయనున్నారనే వార్తలు నిరాధారమని ఆయన అభిమానుల సంఘం స్పష్టం చేసింది. తిరుపతిలో 'మా ఊరు వాడ' పేరుతో కార్యక్రమం ఏర్పాటు చేసి 100 కోట్ల నిధులు కేటాయించే ప్రణాళికలు ఉన్నాయంటూ సోషల్ మీడియాలో గత కొద్ది రోజులుగా వార్తలు వైరల్ అయ్యాయి.

ఈ ప్రచారంపై అభిమానుల సంఘం తీవ్రంగా స్పందించింది. ఇదంతా కొందరు కావాలనే చేస్తున్న కుట్ర అని, ఆ వార్తలను పూర్తిగా తోసిపుచ్చింది. ఈ వదంతులు వ్యాప్తి చేసిన 'రా ఎన్టీఆర్' అనే సంస్థపై తిరుపతి జిల్లా ఎస్పీకి ఫిర్యాదు చేయనున్నట్లు సంఘం ప్రతినిధులు తెలిపారు.

తిరుపతి లాంటి పుణ్యక్షేత్రం సమీపంలో ఈ రకమైన వివాదం సృష్టించడం వెనుక ఎవరున్నారో పోలీసులు విచారించాలని వారు డిమాండ్ చేశారు. ఇలాంటి ఫేక్ వార్తలు ప్రచారం చేస్తే కఠిన చర్యలు తీసుకుంటామని హెచ్చరించారు.