అమలాపురంలో సాగునీటి కోసం రైతుల ఆందోళన; ఇరిగేషన్ కార్యాలయం ముట్టడి

అమలాపురంలోని ఇరిగేషన్ డివిజన్ కార్యాలయం వద్ద ఈరోజు రైతులు నిరసన చేపట్టారు. సాగునీటి విడుదలలో జాప్యం, కాలువల ఆధునికీకరణ పనుల నెపంతో నీటి సరఫరా నిలిపివేశారని రైతులు ఆరోపించారు.

45 రోజులుగా నీరు రాకపోవడంతో సుమారు 40,000 ఎకరాల వరి పంట, చేపల చెరువులు తీవ్రంగా దెబ్బతిన్నాయని రైతులు తెలిపారు. ఆతిముక్కాల లాక్ నుండి నడిపూడి లాక్ వరకు ప్రధాన కాలువకు గోడ నిర్మిస్తున్నారని, కాంట్రాక్టర్ కాలువలో మట్టి వేయడంతో నీరు ప్రవహించడం లేదని చెప్పారు.

రైతులు కార్యాలయం గేట్లకు తాళాలు వేసే ప్రయత్నం చేయడంతో ఉద్రిక్త పరిస్థితి నెలకొంది. నీటిని వెంటనే విడుదల చేయాలని, అధికారుల నిర్లక్ష్యంపై చర్యలు తీసుకోవాలని డిమాండ్ చేశారు. అమలాపురం ఎమ్మెల్యే ఆనంద్‌రావు ఏం చేస్తున్నారని కూడా ప్రశ్నించారు.

నారుమడి పోసుకోవడానికి కూడా నీరు లేకుండా పోయిందని, తాగునీటి ఇబ్బందులు తలెత్తాయని రైతులు వాపోయారు. ఇరిగేషన్ అధికారుల నుంచి తక్షణ స్పందన లేదు.