వరంగల్, ఆదిలాబాద్ విమానాశ్రయాల నిర్మాణంపై CM రేవంత్ - రామ్మోహన్ నాయుడు భేటీ

తెలంగాణ CM రేవంత్ రెడ్డి ఢిల్లీలో కేంద్ర విమానయాన శాఖ మంత్రి రామ్మోహన్ నాయుడును కలిశారు. వరంగల్ మామనూరు, ఆదిలాబాద్ విమానాశ్రయాల నిర్మాణంపై చర్చించారు.

వరంగల్ విమానాశ్రయంలో మెయింటెనెన్స్, రిపేర్స్, ఓవర్హాలింగ్ (MRO), ఎయిర్ కార్గో, హ్యాంగర్ వసతులు, విమాన శిక్షణ సంస్థలు ఏర్పాటు చేయాలని CM కోరారు. దీని కోసం బౌండరీ వాల్ టెండర్ ఇప్పటికే వేసినట్లు, రన్వే టెండర్ సిద్ధంగా ఉన్నట్లు, ప్రధాన టెర్మినల్ భవనం టెండర్ 3-4 వారాల్లో వేస్తామని కేంద్ర మంత్రి తెలిపారు. మొత్తం నిర్మాణం 2028 జూన్ 2 నాటికి పూర్తి చేసి ప్రారంభించాలని లక్ష్యంగా పెట్టుకున్నారు.

ఆదిలాబాద్‌లో ప్రస్తుతమున్న రక్షణ శాఖ విమానాశ్రయంతో పాటు పౌర విమానాశ్రయం నిర్మించాలని CM విజ్ఞప్తి చేశారు. ఇక్కడ కూడా MRO, ఎయిర్ కార్గో, హ్యాంగర్, శిక్షణ సంస్థలు ఏర్పాటు చేయాలన్నారు.

హుస్సేన్ సాగర్ నుంచి విజయవాడ ప్రకాశం బ్యారేజ్ వరకు సీ ప్లేన్ సేవలు నడిపే అంశాన్ని పరిశీలించాలని CM రామ్మోహన్ నాయుడును కోరారు. అభివృద్ధి ప్రాజెక్టుల విషయంలో రాజకీయ విమర్శలు చేయవద్దని, కేంద్రం సహకారం ఉంటుందని CM రేవంత్ వ్యాఖ్యానించారు. విమానాశ్రయాల అభివృద్ధి వల్ల తెలంగాణ యువతకు ఉద్యోగ అవకాశాలు పెరుగుతాయని ఆయన అన్నారు.