వైఎస్ జగన్ నేడు భీమవరంలో ఆక్వా రైతులతో సమావేశం; అధికార కూటమి నేతల విమర్శలు

వైఎస్సార్ కాంగ్రెస్ పార్టీ అధ్యక్షుడు, మాజీ ముఖ్యమంత్రి వైఎస్ జగన్ మోహన్ రెడ్డి నేడు భీమవరంలో పర్యటిస్తున్నారు. ఉదయం 11 గంటలకు బైపాస్ రోడ్డులో ఏర్పాటు చేసిన ఆక్వా రైతుల సమావేశంలో ఆయన పాల్గొంటారు. ఈ సందర్భంగా ఆక్వా రంగంలో నెలకొన్న సంక్షోభం, రైతుల సమస్యలపై నేరుగా వారితో చర్చిస్తారు.

ఈ సమావేశంలో ప్రధానంగా ఆక్వా ఫీడ్ ధరల పెరుగుదల, గిట్టుబాటు ధరలు లేకపోవడం, విద్యుత్ చార్జీల భారం, ఎగుమతుల్లో ఎదురవుతున్న ఇబ్బందులు వంటి అంశాలపై రైతులతో జగన్ మాట్లాడతారు. రా మెటీరియల్ ధరలు పెరిగాయని ఫీడ్ కంపెనీలు రేట్లు పెంచడంతో రైతులు తీవ్ర ఆర్థిక ఇబ్బందులు పడుతున్నారు. ఫీడ్ ధర తగ్గించడం, రొయ్యల కొనుగోలు ధరను పెంచాలని రైతులు డిమాండ్ చేస్తున్నారు.

జగన్ పర్యటనపై అధికార కూటమి నాయకులు విమర్శలు చేశారు. వైఎస్ఆర్సీపీ ప్రభుత్వ హయాంలో ఆక్వా రైతుల పరిస్థితి మరింత దారుణంగా ఉండేదని, ఆక్వా జోన్, నాన్ ఆక్వా జోన్ తేడాతో కరెంట్ సబ్సిడీ సరిగా ఇవ్వలేదని వారు ఆరోపించారు. జగన్ భీమవరం వచ్చినా రైతులకు ఏమీ చేయలేడని, కూటమి ప్రభుత్వమే ఆక్వా రైతులకు న్యాయం చేస్తుందని వారు అన్నారు.