ప్రకాశం జిల్లాలో రూ.1230 కోట్లతో ముడి ఇనుము శుద్ధి కర్మాగారానికి జేఎస్డబ్ల్యూ ప్రతిపాదన

ప్రకాశం జిల్లాలో ముడి ఇనుము శుద్ధి కర్మాగారం ఏర్పాటుకు జేఎస్డబ్ల్యూ గ్రూప్ ప్రతిపాదించింది. దీనిపై రూ.1230 కోట్ల పెట్టుబడి పెట్టనున్నట్లు తెలిపింది.

ఏటా 5 మిలియన్ టన్నుల ముడి ఇనుప ఖనిజాన్ని ఉపయోగించుకునే సామర్థ్యంతో ఈ ప్రాజెక్టు రూపొందనుంది. ఇందుకు అవసరమైన ఖనిజం ఏపీ మినరల్ డెవలప్మెంట్ కార్పొరేషన్ (ఏపీఎండీసీ) గనుల నుంచి లీజు పద్ధతిలో లభిస్తుంది. 15 ఏళ్ల పాటు తవ్వకాల హక్కులు కోరగా, బదులుగా ఏపీఎండీసీకి ఎలాంటి పెట్టుబడి లేకుండా జాయింట్ వెంచర్‌లో 11% ఈక్విటీ వాటా ఇస్తామని జేఎస్డబ్ల్యూ ప్రతిపాదించింది.

ప్రభుత్వ అనుమతులు వచ్చాక ఆగస్టులో నిర్మాణం మొదలుపెట్టి, 2027 ఏప్రిల్ నాటికి సివిల్ పనులు పూర్తి చేయాలని సంస్థ లక్ష్యంగా పెట్టుకుంది. అదే ఏడాది డిసెంబర్ నాటికి వాణిజ్య ఉత్పత్తి ప్రారంభించే ప్రణాళిక రూపొందించింది. భవన నిర్మాణానికి రూ.143 కోట్లు, యంత్ర సామగ్రికి రూ.914 కోట్లకు పైగా ఖర్చయ్యే అంచనా.

ఈ ప్రాజెక్టు ద్వారా ప్రత్యక్ష ఉపాధితోపాటు రవాణా, లాజిస్టిక్స్, అనుబంధ రంగాల్లో మరిన్ని ఉద్యోగ అవకాశాలు లభిస్తాయి. ప్రభుత్వానికి రాయల్టీలు, మినరల్ ట్రస్ట్ ఫండ్, ఖనిజ అన్వేషణ నిధుల ద్వారా రూ.4,480 కోట్ల వరకు ఆదాయం లభించగలదని అంచనా.