జూబ్లీ క్లబ్ భూమి వ్యవహారం: 2000 మంది సభ్యుల వద్ద లక్షలు వసూలు

జూబ్లీ హిల్స్ హౌసింగ్ సొసైటీ ఫేజ్ ఫోర్ పేరుతో నగరంలో ఒక భూమి వ్యవహారం వెలుగులోకి వచ్చింది. మంచిరేవుల ప్రాంతంలో ఒక బిల్డర్‌కు చెందిన 16 ఎకరాల భూమిని తమ భూమిగా చూపించి, కొత్త సభ్యత్వాల పేరుతో లక్షలు వసూలు చేశారని ఆరోపణలు వచ్చాయి.

సుమారు 2,000 మంది సభ్యుల వద్ద ఒక్కొక్కరి నుండి ₹5 లక్షలకు పైగా వసూలు చేశారని ఆరోపణలు ఉన్నాయి. జూబ్లీ క్లబ్‌లో జరిగిన సమావేశంలో నిర్మాణ నమూనా చూపించి, సహకార శాఖ మంత్రి తుమ్మల ప్రారంభోత్సవం నిర్వహించారు.

ఈ వ్యవహారం బయటపడిన నేపథ్యంలో క్లబ్ చైర్మన్‌తో సహా పాలక మండలి సభ్యులు కొందరు అందుబాటులో లేకుండా పోయారని జూబ్లీ క్లబ్‌లో చర్చ జరుగుతోంది. సొసైటీలో కొత్తగా సభ్యత్వం తీసుకున్న వారు 2-3 రోజుల్లో న్యాయపరంగా ముందుకు వెళ్లాలని భావిస్తున్నారు.

CM రేవంత్ రెడ్డి కూడా జూబ్లీ క్లబ్‌లో సభ్యుడు కావడంతో, ఈ వ్యవహారం CMO దృష్టికి వచ్చింది. గతంలో మంత్రి కొండా సురేఖ పేరు మంచిరేవుల భూ వివాదంలో ప్రస్తావన వచ్చింది. ఈ వ్యవహారంలో మంత్రికి, CM కి తెలుసా లేదా అనే విషయంపై ఆయా పక్షాల స్పందన తెలియాల్సి ఉంది.