యువతిపై లైంగిక దాడి, వసూలు ఆరోపణలతో జూబ్లీహిల్స్ సీఐ బదిలీ

జూబ్లీహిల్స్ ఇన్‌స్పెక్టర్‌గా పనిచేస్తున్న శ్రీనివాస్ రెడ్డిని విజిలెన్స్ రేంజ్‌కు బదిలీ చేస్తూ హైదరాబాద్ సిటీ పోలీస్ కమిషనర్ ఆదేశాలు జారీ చేశారు. ఒక మహిళ చేసిన ఆరోపణలపై పోలీస్ శాఖ అంతర్గత విచారణలో ఆమె ఫిర్యాదు నిజమని తేలడంతో ఈ బదిలీ వేటు పడింది.

మూడేళ్ల క్రితం భర్త వేధింపులపై ఫిర్యాదు చేసేందుకు సంగారెడ్డి జిల్లా పోలీస్ స్టేషన్‌కు వెళ్లిన ఒక యువతిపై శ్రీనివాస్ రెడ్డి కన్నేసి, ఆమెను తన నివాసానికి తీసుకెళ్లి లైంగిక దాడికి పాల్పడ్డాడని ఆమె ఆరోపించింది. ఆ తర్వాత సన్నిహితంగా ఉన్న సమయాల్లో ఫొటోలు, వీడియోలు రికార్డు చేసి బ్లాక్‌మెయిల్ చేస్తూ, గత రెండేళ్లలో సుమారు రూ.2 కోట్లు వసూలు చేశాడని ఆమె డీజీపీకి ఫిర్యాదు చేసింది.

అంతేకాకుండా, బలవంతంగా తనకు అబార్షన్ చేయించాడని, పోలీస్ శాఖ తనకు అండగా ఉందని బెదిరించాడని, తన ప్రాణాలకు ప్రమాదం ఉందని కూడా ఆమె తన ఫిర్యాదులో పేర్కొంది. తాను పంపిన డబ్బు లావాదేవీల స్క్రీన్‌షాట్లను ఆధారాలుగా సమర్పించింది.

గతంలో స్థానిక అధికారులకు ఫిర్యాదు చేసినా ఎలాంటి చర్యలు తీసుకోలేదని, అధికార దుర్వినియోగానికి పాల్పడుతున్నారని ఆమె ఆరోపించింది. అలాగే, రూ.25 లక్షలు లంచం ఇచ్చి శ్రీనివాస్ రెడ్డి ఈ ఉద్యోగం సాధించాడనీ ఆమె ఫిర్యాదులో వెల్లడించింది.

బాధితురాలి ఫిర్యాదు మేరకు పోలీస్ శాఖ అంతర్గత దర్యాప్తు చేపట్టగా, ఆమె ఆరోపణలు వాస్తవమేనని నిర్ధారణ అయింది. దీంతో హైదరాబాద్ సీపీ వెంటనే స్పందించి, శ్రీనివాస్ రెడ్డిని విజిలెన్స్ రేంజ్‌కు బదిలీ చేశారు. ఈ కేసులో తదుపరి చర్యలపై పోలీస్ శాఖ అధికారిక ప్రకటన చేయాల్సి ఉంది.