తిరుమలలో జ్యేష్టాభిషేకం ఉత్సవాలు ప్రారంభం – TTD ప్రత్యేక ఏర్పాట్లు

తిరుమల శ్రీవేంకటేశ్వరస్వామి ఆలయంలో ఉత్సవమూర్తుల పరిరక్షణ కోసం నిర్వహించే వార్షిక జ్యేష్టాభిషేకం ఉత్సవాలు శుక్రవారం ప్రారంభమయ్యాయి.

మూడు రోజుల పాటు జరిగే ఈ ఉత్సవాలు జ్యేష్ట మాసంలో జ్యేష్ట నక్షత్రంతో ముగుస్తాయి. మొదటి రోజున స్వామి అమ్మవార్లను కల్యాణోత్సవ మండపంలో కొలువుదీర్చి, ఆవాహనం, నవగ్రహ పూజ, కలశారాధన, హోమం నిర్వహిస్తారు. అనంతరం మలయప్పస్వామి వారి పంచలోహ కవచాలను సడలింపు చేసి, స్నపన తిరుమంజనం నిర్వహిస్తారు.

రెండో రోజు ముత్యాల కవచంతో అలంకరిస్తే, మూడో రోజు మరమత్తులు చేసిన కవచాలను మళ్ళీ ధారణ చేయడంతో ఉత్సవం ముగుస్తుంది. ఏడాది పొడవునా నిత్య ఉత్సవాల వల్ల ఉత్సవమూర్తుల విగ్రహాలు అరిగిపోకుండా 1980 నుంచి TTD ఈ కవచధారణ కార్యక్రమాన్ని నిర్వహిస్తోంది.

ఈ వేడుకల నేపథ్యంలో 28వ తేదీన శ్రీవారి ఆలయంలో ఆర్జిత సేవలు రద్దు చేసినట్టు TTD తెలిపింది. మూడో రోజు స్వామివారు స్వర్ణ కవచంలో భక్తులకు దర్శనమిస్తారు. తిరిగి వచ్చే ఏడాది జ్యేష్టాభిషేకం రోజున ఆ కవచాన్ని తొలగిస్తారు.