కాకినాడ GGH లో వడదెబ్బ రోగులకు ప్రత్యేక వార్డు: డాక్టర్ సత్యవాణి

కాకినాడ జిల్లా ప్రభుత్వ ఆసుపత్రి (GGH) లో వడదెబ్బ బాధితులకు ప్రత్యేక వార్డు ఏర్పాటు చేశారు. అత్యవసర విభాగం HOD డాక్టర్ సత్యవాణి ఈ విషయాన్ని తెలిపారు. AC రూమ్, oxygen సప్లై, IV fluids, అవసరమైన మందులు అన్నీ సిద్ధంగా ఉన్నాయని ఆమె చెప్పారు.

కాకినాడ జిల్లాలో ఉష్ణోగ్రతలు రోజురోజుకూ పెరుగుతున్నాయి. రానున్న నాలుగు రోజుల్లో ఉష్ణోగ్రతలు మరింత పెరిగే అవకాశం ఉందని వాతావరణ శాఖ హెచ్చరించింది. అత్యవసరం అయితే తప్ప ఉదయం 11 గంటల నుంచి సాయంత్రం 4 గంటల వరకు బయటకు రావద్దని డాక్టర్ సత్యవాణి సూచించారు.

వడదెబ్బ లక్షణాలు గురించి ఆమె వివరిస్తూ — తల తిరగడం, వాంతులు, కళ్ళు లోతుగా పోవడం, చర్మం ఎండిపోవడం, దాహం ఎక్కువగా వేయడం, నోరు పెదవులు పొడిబారడం — ఇవి dehydration సంకేతాలని చెప్పారు.

జాగ్రత్తల విషయంలో ఆమె చెప్పిందేమంటే: తెలుపు రంగు cotton దుస్తులు ధరించాలి. గొడుగు వాడాలి. నీరు, మజ్జిగ, కొబ్బరి నీళ్లు, ORS fluids తీసుకోవాలి. ఎండ నుంచి ఇంటికి వచ్చిన వెంటనే చల్లటి నీళ్లు తాగకూడదు.

చిన్న పిల్లలు, వృద్ధులు, గర్భిణి స్త్రీలు, దీర్ఘకాలిక వ్యాధులు ఉన్న వారు వడదెబ్బకు త్వరగా గురవుతారని డాక్టర్ సత్యవాణి హెచ్చరించారు. వారు వీలైనంత వరకు ఎండలో బయటకు వెళ్లకూడదని సూచించారు. వాంతులు, విరేచనాలు, అధిక జ్వరం వంటి లక్షణాలు కనిపిస్తే వెంటనే దగ్గరలోని ఆసుపత్రికి చేరుకోవాలని ఆమె తెలిపారు.