కాకినాడలో లారీ దెబ్బకు నలుగురు ఉపాధి హామీ మహిళా కార్మికుల మృతి

కాకినాడ జిల్లాలో గురువారం తెల్లవారుజామున 6:30 గంటలకు ఒక తీవ్రమైన రోడ్డు ప్రమాదం జరిగింది. ఉపాధి హామీ కార్మికులు గ్రూప్ ఫోటో దిగిన తర్వాత పని ప్రదేశంలోకి వెళ్తుండగా వేగంగా వచ్చిన టిప్పర్ లారీ వారిని డీ కొట్టింది.

కొవ్వూరు బ్రిడ్జ్ వద్ద జరిగిన ఈ ప్రమాదంలో నలుగురు మహిళా కార్మికులు అక్కడికక్కడే మృతి చెందారు. మరో ఇద్దరికి తీవ్రమైన గాయాలయ్యాయి. మృతులను వాసంశెట్టి సత్యవతి, పాలిక కృష్ణవేణి, చిట్టెమ్మ, చెల్లూరి అన్నవరంగా పోలీసులు గుర్తించారు. గాయపడిన వారికి కాకినాడ జీజీహెచ్‌లో చికిత్స అందుతోంది.

లారీ డ్రైవర్ మద్యం మత్తులో ఉన్నాడని తోటి కార్మికులు తెలిపారు. సుమారు 20 మంది కార్మికులు ఆ సమయంలో రోడ్డు మీద ఉన్నారు. పోలీసులు కేసు నమోదు చేసి దర్యాప్తు చేస్తున్నారు.

ఉపముఖ్యమంత్రి పవన్ కళ్యాణ్ ఈ ఘటనను తీవ్రంగా పరిగణించారు. పని ప్రదేశాల వద్ద వేగ నియంత్రణకు హెచ్చరిక బోర్డులు ఏర్పాటు చేయాలని ఆదేశించారు. మంత్రి నారా లోకేష్ మృతుల కుటుంబాలకు ప్రభుత్వం అండగా ఉంటుందని హామీ ఇచ్చారు. కాకినాడ రూరల్ ఎమ్మెల్యే పంతం నానాజీ గాయపడిన వారిని పరామర్శించారు. ప్రతి మృతుల కుటుంబానికి తక్షణ సాయంగా లక్ష రూపాయలు అందించారు.