కాకినాడ ఎంపీ తంగెళ్ల ఉదయ శ్రీనివాస్, తుని, కాపవరంలో రోడ్ అండర్ బ్రిడ్జిల నిర్మాణానికి రైల్వే మంత్రికి లేఖ

కాకినాడ పార్లమెంట్ సభ్యులు తంగెళ్ల ఉదయ శ్రీనివాస్ కేంద్ర రైల్వే మంత్రి అశ్విని వైష్ణవకు లేఖ రాశారు. తుని రైల్వే స్టేషన్ యార్డ్ వద్ద, కాపవరం గ్రామం వద్ద రోడ్ అండర్ బ్రిడ్జిల (RUB) నిర్మాణం కోసం తక్షణ చర్యలు చేపట్టాలని ఈ లేఖలో కోరారు.

తుని యార్డ్ వద్ద ఉన్న ఇరుకైన కల్వర్ట్ను ప్రతిరోజు 40,000 మందికి పైగా వినియోగిస్తున్నారు. పెరుగుతున్న ట్రాఫిక్ వల్ల తీవ్ర రద్దీ, ప్రమాదకర పరిస్థితులు ఏర్పడుతున్నాయి. వర్షాకాలంలో నీరు నిలిచిపోవడంతో ప్రజలు రైల్వే పట్టాలు దాటాల్సి వస్తోంది. అత్యవసర సమయాల్లో అంబులెన్సులు అదనంగా 4 కిలోమీటర్లు ప్రయాణించాల్సి వస్తోందని ఎంపీ లేఖలో వివరించారు.

ఇదే విషయాన్ని గత పార్లమెంట్ బడ్జెట్ సమావేశాల్లో ప్రస్తావించినట్లు ఎంపీ గుర్తు చేశారు. స్థానిక ప్రజలు, రైతుల నుండి వచ్చిన విజ్ఞప్తుల మేరకు ఈ లేఖ రాశారు. సామర్లకోట మండలంలోని కాపవరం గ్రామంలో కూడా RUB లేక తీవ్ర ఇబ్బందులు ఎదురవుతున్నాయని తెలిపారు.

ప్రాధాన్యత ప్రాతిపదికన పనులు చేపట్టాలని ఎంపీ లేఖలో విజ్ఞప్తి చేశారు. ఈ ప్రాంతాల్లో రాకపోకల సౌలభ్యం కోసం వెంటనే చర్యలు తీసుకోవాలని కోరారు.