పెళ్లైన 22 రోజులకే నవవధువు మృతి: భర్త వేధించాడని కుటుంబం ఆరోపణ

కాకినాడ జిల్లా పెద్దాపురం మండలం మర్లావ గ్రామానికి చెందిన వెంకటలక్ష్మి ఆదివారం తెల్లవారు జామున మరణించారు. ఆమె పెళ్లి జరిగి కేవలం 22 రోజులు మాత్రమే అయింది.

కిర్లంపూడి మండలం గోన గ్రామానికి చెందిన సత్యంశట్టి వెంకటలక్ష్మికి, మర్లావ గ్రామానికి చెందిన గాది కోటేశ్వరరావుకి ఏప్రిల్ 25న వివాహం జరిగింది. పెళ్లి జరిగిన మొదటి రాత్రే తనకు వేరే మహిళలతో సంబంధం ఉందని భర్త చెప్పినట్టు కుటుంబ సభ్యులు తెలిపారు.

పెళ్లికి రెండు రోజుల ముందు భర్త మరో యువతితో సెటిల్మెంట్ చేసుకుని రూ.2 లక్షలు ఇచ్చినట్టు కూడా బయటపడింది. అసభ్యకర చిత్రాలు WhatsApp లో పంపి భర్త వేధించాడని వెంకటలక్ష్మి తన కుటుంబ సభ్యులకు చెప్పినట్టు వారు తెలిపారు.

రెండు రోజుల క్రితం వెంకటలక్ష్మి పుట్టింటికి వచ్చి మాట్లాడకుండా ఉండటంతో తల్లి, సోదరి విషయం అడిగారు. అప్పుడు ఆమె జరిగిన విషయాలు చెప్పింది. అత్తారింటికి వెళ్లి భర్తను నిలదీయాలని కుటుంబం నిర్ణయించుకుంది. కానీ అదే రాత్రి వెంకటలక్ష్మి మరణించారు.

భర్త, అత్తింటి వారి వేధింపులు మానసికంగా తనను కుంగదీశాయని, అందుకే ఆమె ఈ అడుగు వేసిందని కుటుంబ సభ్యులు ఆరోపిస్తున్నారు. పోలీసులు కేసు నమోదు చేసి దర్యాప్తు చేస్తున్నారు.