కాకినాడ RTC డిపో: డ్రైవర్ల రెస్ట్ రూమ్‌కు ‘మేము సైతం’ నుంచి 15 పరుపులు

కాకినాడ ఆర్టీసి డిపోలోని డ్రైవర్ల విశ్రాంతి గదికి ‘మేము సైతం’ స్వచ్ఛంద సంస్థ 15 పరుపులు అందజేసింది. డ్రైవర్లకు తగిన విశ్రాంతి సౌకర్యాలు లేవని, రెస్ట్ రూమ్‌లో పరుపుల కొరత ఉందని తెలుసుకున్న ఆర్టీసీ యూనియన్ నాయకుడు చిన్నబాబు ఈ సంస్థ ప్రతినిధులకు సూచించారు.

దీంతో ఉమ్మడి తూర్పు గోదావరి జిల్లా లారీ అసోసియేషన్ అధ్యక్షుడు, ‘మేము సైతం’ సంస్థ వ్యవస్థాపకుడు దొగ్గ బాబ్జీ వెంటనే స్పందించారు. ఆయన కేవలం 24 గంటల వ్యవధిలో 15 మెట్రెస్ పరుపులు సమకూర్చి శనివారం డిపో అధికారుల సమక్షంలో డ్రైవర్లకు అందజేశారు.

డ్రైవర్లకు సరైన నిద్ర లేకపోతే ప్రయాణికుల భద్రతకు ప్రమాదం ఏర్పడుతుందని భావించే ఈ చర్య తీసుకున్నట్లు సంస్థ ప్రతినిధులు తెలిపారు. ఆర్టీసీ యాజమాన్యం ఈ సహాయానికి కృతజ్ఞతలు తెలిపింది.