తోటపేట వెలివేత వివాదంలో ట్విస్ట్: గ్రామ పెద్దలు ఆరోపణలు తోసిపుచ్చారు

కాకినాడ జిల్లా తాళ్లరేవు మండలం తోటపేట గ్రామంలో 40 కుటుంబాలను వెలివేశారన్న ఆరోపణలపై వివాదం నెలకొంది. గ్రామ పెద్దలు ఈ ఆరోపణలను తోసిపుచ్చారు.

ఎవరినీ వెలివేయలేదని, అందరూ కలిసే ఉంటున్నారని గ్రామస్థులు తెలిపారు. ఆరోపణలకు గురైన కుటుంబాలు గ్రామంలోని దుకాణాల్లో సరుకులు కొనుగోలు చేస్తున్నాయని, అన్ని కార్యక్రమాల్లో పాల్గొంటున్నాయని వారు వివరించారు.

ఈ వివాదానికి మూలకారణం భూమి విషయంలో ఏర్పడిన గొడవ అని స్థానికులు తెలిపారు. ఒక స్థలానికి దారి ఇవ్వాలని కోరగా, సదరు వ్యక్తి ఇవ్వడానికి నిరాకరించాడని వివరించారు. ఈ భూ వివాదం నుండే పెళ్లి వంటి కార్యక్రమాలకు పిలవడం, రాకపోవడం వంటి పరిస్థితులు తలెత్తాయని పేర్కొన్నారు.

పోలీసులు కూడా ఈ వ్యవహారంలో జోక్యం చేసుకున్నారు. SI, DI అధికారులు గ్రామానికి వచ్చి రెండు వర్గాలను చేతులు కలపించి మాట్లాడుకోవాలని కోరారు. కొందరు వ్యక్తులు లేని సమస్యలు సృష్టించారని గ్రామ పెద్దలు ఆరోపించారు. అందరూ కలిసి ఉండాలని తోటపేట గ్రామస్థులు పిలుపునిచ్చారు.