కాళేశ్వరంలో సరస్వతి అంత్య పుష్కరాలు ప్రారంభం — తొలిరోజే భారీ భక్తుల తాకిడి

కాళేశ్వరంలోని గోదావరి త్రివేణి సంగమంలో సరస్వతి అంత్య పుష్కరాలు ప్రారంభమయ్యాయి. తెల్లవారు జామున 5:43 గంటలకు కంచి కామకోటి పీఠాధిపతి శంకర విజయేంద్ర సరస్వతి పుష్కర స్నానం చేసి అంత్య పుష్కరాలకు శ్రీకారం చుట్టారు. ఆ తర్వాత మంత్రులు కొండా సురేఖ, శ్రీధర్ బాబు పుణ్యస్నానాలు ఆచరించారు.

పుష్కరాల తొలిరోజు ఆలయ ప్రాంగణం భక్తులతో కిక్కిరిసిపోయింది. తెలంగాణ, ఆంధ్రప్రదేశ్‌తో పాటు మహారాష్ట్ర నుంచి కూడా భక్తులు పెద్ద సంఖ్యలో తరలి వచ్చారు. అంత్య పుష్కరాలు జూన్ 1 వరకు 12 రోజుల పాటు కొనసాగనున్నాయి.

ఈ పుష్కరాలకు ప్రభుత్వం దాదాపు ₹30 కోట్లు కేటాయించింది. భక్తులకు బస్సు సౌకర్యాలు, గుడారాలు, బసచేసే ఏర్పాట్లు చేశారు. కాశీ నుంచి వేద పండితులను పిలిపించారు. ప్రతి సాయంత్రం గోదావరి హారతి, సరస్వతి హారతి కార్యక్రమాలు నిర్వహించనున్నారు.

ప్రతిరోజు ఒక పీఠాధిపతి నదిలో పుణ్యస్నానం ఆచరించనున్నారు. ట్రాఫిక్ నిర్వహణ కోసం పోలీసులు భారీ బందోబస్తు ఏర్పాటు చేశారు. హైదరాబాద్, వరంగల్, చెన్నూరు, మహారాష్ట్ర వైపు నుంచి వచ్చే వాహనాలను మళ్ళించే ఏర్పాట్లు చేశారు.