కాళేశ్వరం సరస్వతి అంత్య పుష్కరాలు: మే 21 నుంచి జూన్ 1 వరకు

జయశంకర్ భూపాలపల్లి జిల్లాలోని కాళేశ్వరంలో సరస్వతి నది అంత్య పుష్కరాలు మే 21 నుంచి జూన్ 1 వరకు జరుగుతాయి. కాళేశ్వరం వద్ద గోదావరి, ప్రాణహిత నదులు కలిసే చోట అంతర్వాహినిగా సరస్వతి నది ఉంది. ఈ ప్రాంతాన్ని దక్షిణ త్రివేణి సంగమంగా పిలుస్తారు.

కంచి కామకోటి పీఠాధిపతి శంకర విజయేంద్ర సరస్వతి స్వామీజీ మే 21 తెల్లవారు జామున మూడు నుంచి నాలుగు గంటల మధ్య తొలి పుణ్యస్నానం ఆచరించి పుష్కరాలను ప్రారంభిస్తారు. 11 రోజుల పాటు ప్రతి ఉదయం హోమాలు, యజ్ఞాలు జరుగుతాయి. సాయంత్రం గంగా హారతులు నిర్వహిస్తారు.

తెలంగాణ ప్రభుత్వం 30 నుంచి 40 లక్షల మంది భక్తులు వస్తారని అంచనా వేసింది. దానికి అనుగుణంగా ట్రాఫిక్, మంచినీటి సదుపాయాలు, స్నాన ఘట్టాలు, దర్శన ఏర్పాట్లు చేశారు. పార్కింగ్ కోసం 24 ప్రదేశాల్లో సుమారు 200 ఎకరాల స్థలం కేటాయించారు.

జిల్లా కలెక్టర్, SP పర్యవేక్షణలో ఏర్పాట్లు జరిగాయి. మంత్రి దుద్దిల్ల శ్రీధర్ బాబు, దేవాదాయ శాఖ మంత్రి కొండ సురేఖ ఏర్పాట్లను పర్యవేక్షిస్తున్నారు.