కామారెడ్డిలో రికార్డు 18 సెంటీమీటర్ల వర్షం; రోడ్లు మూత, 45 మంది ప్రయాణికులు రక్షణ

కామారెడ్డి జిల్లాలో నిన్న రాత్రి కురిసిన భారీ వర్షాలకు రికార్డు స్థాయిలో 18 సెంటీమీటర్ల వర్షపాతం నమోదైంది. పట్టణంలోని లోతట్టు ప్రాంతాలు జలమయమయ్యాయి.

కామారెడ్డి పట్టణంలోని సుభాష్ థియేటర్ సమీపంలో రోడ్డుపై వరద నీరు చేరడంతో ఓ ప్రైవేట్ బస్సు చిక్కుకుంది. అందులో 45 మంది ప్రయాణికులు ఉండగా, వారిని పోలీస్, ఫైర్ సిబ్బంది తాళ్ల సాయంతో సురక్షితంగా బయటకు తీశారు.

జిల్లాలోని పిట్లం (12 సెం.మీ.), ముగ్దుంపూర్ (12 సెం.మీ.), గాంధారి (11 సెం.మీ.) తదితర ప్రాంతాల్లో అత్యధిక వర్షం నమోదైంది. పలు మండలాల్లో వాగులు, చెరువులు ఉద్ధృతంగా ప్రవహిస్తున్నాయి. పాల్వంచ వాగు, భీమేశ్వర వాగు ప్రవాహంతో కామారెడ్డి-రామారెడ్డి, కామారెడ్డి-లింగంపేట మార్గాల్లో రాకపోకలు నిలిపివేశారు.

పోచారం ప్రాజెక్ట్ పూర్తి సామర్థ్యం మేరకు (1.82 టీఎంసీ) నిండింది. దీనికి 2,500 క్యూసెక్కుల ఇన్‌ఫ్లో వస్తోంది, నీరంతా నిజాంసాగర్‌కు చేరుతోంది. నిజాంసాగర్‌కు 4,000 క్యూసెక్కుల వరద నీరు వచ్చింది. గంజ్ మార్కెట్ యార్డ్ సమీపంలోని ప్రభుత్వ పాఠశాలలోకి వరద నీరు చేరడంతో ఈరోజు సెలవు ప్రకటించారు.

వాతావరణ శాఖ కామారెడ్డి జిల్లాకు ఆరెంజ్ అలర్ట్ కొనసాగిస్తోంది. మరో రెండు రోజులపాటు భారీ వర్షాలు ఉండే అవకాశం ఉందని, ప్రజలు అప్రమత్తంగా ఉండాలని అధికారులు సూచించారు. వాగులు, చెరువులు దాటవద్దని సలహా ఇచ్చారు.