కామారెడ్డి: వికాస్ నగర్‌లో అనుమతి లేని రెండు వెంచర్ల నిర్మాణాలు కూల్చివేత

కామారెడ్డి జిల్లా కేంద్రంలోని ఏడో వార్డు వికాస్ నగర్‌లో అనుమతి లేకుండా చేపట్టిన రెండు వెంచర్ల నిర్మాణాలను శుక్రవారం అధికారులు కూల్చివేశారు.

ఐదు ఎకరాల విస్తీర్ణంలో సాగుతున్న ఈ నిర్మాణాలపై మున్సిపల్ అధికారులు మూడుసార్లు నోటీసులు జారీ చేశారు. నిర్వాహకులు స్పందించకపోవడంతో కూల్చివేత చర్యలు తీసుకున్నట్లు మున్సిపల్ కమిషనర్ పర్వతాలు తెలిపారు.

ప్రజలు ప్రభుత్వ అనుమతి లేని వెంచర్లలో ప్లాట్లు కొనవద్దని, కొనుగోలు చేసేముందు తమ కార్యాలయంలో విచారించుకోవాలని కమిషనర్ విజ్ఞప్తి చేశారు. రియల్టర్లు ప్రభుత్వ నిబంధనల ప్రకారమే లేఔట్లు చేయాలని సూచించారు.

కూల్చివేతపై ఒక స్థానిక నివాసి ఆరోపణలు చేశాడు. టీపీఓ కమిషనర్, కమిషనర్‌తో పాటు ఇతర అధికారులు డబ్బులు తీసుకొని ఇలాంటి చర్యలకు పాల్పడుతున్నారని, డబ్బు ఇవ్వనివారిపై జేసీబీలతో అక్రమ నిర్మాణాల పేరుతో కూల్చివేతలు చేస్తున్నారని ఆరోపించాడు. ఈ విషయంపై కలెక్టర్‌కు ఫిర్యాదు చేస్తానని చెప్పాడు.

అనుమతి లేని లేఔట్లలో రోడ్లు, మౌలిక సదుపాయాలు తొలగించామని, పట్టణాన్ని స్వచ్ఛంగా ఉంచేందుకు అందరూ సహకరించాలని మున్సిపల్ కమిషనర్ పిలుపునిచ్చారు. అనుమతి లేని నిర్మాణాలపై తగిన చర్యలు కొనసాగిస్తామని హెచ్చరించారు.