AP ప్రభుత్వం 'ASK AI About AP' యాప్ ప్రారంభించనున్నట్లు మంత్రి కందుల వెల్లడి

ఆంధ్రప్రదేశ్ పర్యాటక శాఖ మంత్రి కందుల దుర్గేష్ రాష్ట్ర ప్రభుత్వం పర్యాటక రంగాన్ని మెరుగుపరిచేందుకు సాంకేతిక చర్యలు చేపడుతోందని తెలిపారు. ఈ మేరకు 'ASK AI About AP' అనే AI ఆధారిత యాప్‌ను అందుబాటులోకి తీసుకురానున్నట్లు ప్రకటించారు.

ఈ యాప్ ద్వారా పర్యాటక ప్రదేశాలు, దేవాలయాల చరిత్ర, విశేషాలు వంటి సమాచారాన్ని కచ్చితంగా తెలియజేస్తామని మంత్రి వివరించారు. రాష్ట్రంలో 100 దేవాలయాలు, పర్యాటక కేంద్రాలను గుర్తించి, అక్కడ QR కోడ్ బోర్డులు ఏర్పాటు చేస్తామని పేర్కొన్నారు. సందర్శకులు తమ స్మార్ట్‌ఫోన్‌లతో QR కోడ్ స్కాన్ చేసి వివరాలు తెలుసుకోవచ్చని చెప్పారు.

AI, క్వాంటం కంప్యూటింగ్ వంటి సాంకేతికతల వినియోగంలో ఆంధ్రప్రదేశ్ ముందుందని మంత్రి అభిప్రాయపడ్డారు. పర్యాటక రంగానికి ఇండస్ట్రీ స్టేటస్ ఇవ్వడం వల్ల ఆదరణ పెరిగిందని తెలిపారు. ఈ యాప్ పర్యాటకుల సంఖ్య పెరగడానికి దోహదపడుతుందని ఆయన ఆశాభావం వ్యక్తం చేశారు.

రాబోయే మూడేళ్ల కాలంలో ఈ యాప్‌ను అన్ని ప్రధాన పర్యాటక స్థలాల్లో విస్తరించాలనేది ప్రభుత్వ లక్ష్యంగా మంత్రి పేర్కొన్నారు.