కన్నెపల్లి పంప్ హౌస్ ఆన్ చేస్తే నష్టాలపై ఇరిగేషన్ మంత్రి ప్రెజెంటేషన్

కన్నెపల్లి పంప్ హౌస్ నుంచి నీటిని ఎత్తిపోస్తే జరిగే నష్టాలపై తెలంగాణ నీటిపారుదల శాఖ మంత్రి ఉత్తమ్ కుమార్ రెడ్డి ఈ రోజు సాయంత్రం 6 గంటలకు ప్రజాభవన్‌లో పవర్‌పాయింట్ ప్రెజెంటేషన్ ఇవ్వనున్నారు. ఈ సమావేశంలో సీఎం రేవంత్ రెడ్డి, శాసనసభ స్పీకర్, శాసనమండలి చైర్మన్, మంత్రులు, ఎమ్మెల్యేలు, ఎమ్మెల్సీలు, ఎంపీలు, కార్పొరేషన్ చైర్మన్‌లు, కాంగ్రెస్ మిత్రపక్షాల ప్రతినిధులు పాల్గొననున్నారు.

BRS నేతలు ఇటీవల కన్నెపల్లి పంప్ హౌస్ నుంచి వెంటనే నీటిని ఎత్తిపోయాలని డిమాండ్ చేస్తున్నారు. BRS వర్కింగ్ ప్రెసిడెంట్ కేటీఆర్ అక్కడ పర్యటించి, ప్రభుత్వం సమర్ధత లేకపోతే కేసీఆర్‌కు వారం రోజులు అప్పగించాలని, కాళేశ్వరం ప్రాజెక్టులో నీళ్లు నింపి చూపిస్తామని వ్యాఖ్యానించారు. వారం లోపు పంప్ ఆన్ చేయకపోతే 50,000 మంది రైతులతో ముట్టడిస్తామని కూడా హెచ్చరించారు.

ప్రభుత్వ వర్గాల సమాచారం ప్రకారం, ఈ ప్రెజెంటేషన్‌లో కన్నెపల్లి పంప్ ఆన్ చేస్తే ఏర్పడే సాంకేతిక, ఆర్థిక, నిర్వహణ పరమైన నష్టాలు వివరించనున్నారు. అన్నారం బ్యారేజీకి సంబంధించి నేషనల్ డ్యామ్ సేఫ్టీ అథారిటీ (NDSA) గతంలో ఇచ్చిన నివేదిక ప్రకారం, బ్యారేజీ కుంగిపోయే ప్రమాదం ఉన్నందున నీటి నిల్వ ఉంచకూడదని, గేట్లు ఎత్తి ఉంచాలని సూచించినట్లు తెలిసింది. ప్రస్తుతం ప్రభుత్వం మరమ్మతుల కోసం నిపుణుల కమిటీని నియమించింది. ఈ నేపథ్యంలో పంప్ ఆన్ చేస్తే తీవ్ర నష్టం జరుగుతుందని, దాని పూర్తి వివరాలు నేతలకు, ప్రజలకు అర్థమయ్యేలా ఈ ప్రెజెంటేషన్‌లో చెప్పనున్నారు.

సమావేశం తర్వాత సీఎం రేవంత్ రెడ్డి మాట్లాడే అవకాశం ఉంది. కన్నెపల్లి పంప్‌పై రాజకీయ వివాదం నేపథ్యంలో ఇరిగేషన్ శాఖ ఈ ప్రెజెంటేషన్ ద్వారా సాంకేతిక కారణాలను స్పష్టం చేయనుంది.