ఉండిలో విబిజి రాంజీ పథకం ప్రారంభించిన డిప్యూటీ స్పీకర్ రఘురామకృష్ణరాజు

పశ్చిమ గోదావరి జిల్లా ఉండిలో విబిజి రాంజీ పథకాన్ని డిప్యూటీ స్పీకర్, ఉండి ఎమ్మెల్యే కనుమూరి రఘురామకృష్ణరాజు ప్రారంభించారు. ఈ పథకం కేంద్ర ప్రభుత్వ గ్రామీణాభివృద్ధి కార్యక్రమం. గ్రామీణ ప్రాంతాల్లో మౌలిక వసతులు మెరుగుపరచడం, పచ్చదనం పెంచడం దీని లక్ష్యం.

అనంతరం మొక్కలు నాటిన ఆయన, ప్రతి గ్రామంలో చెరువుల పరిశుభ్రత, వాకింగ్ ట్రాక్‌లు, విద్యుద్దీపాలు ఏర్పాటుకు ప్రాధాన్యత ఇస్తామన్నారు. తన నియోజకవర్గంలోని అన్ని గ్రామాల్లో మంచినీటి చెరువులు ఉన్నాయని, వాటిని ప్రజలకు ఉపయోగకరంగా తీర్చిదిద్దుతామని వివరించారు.

పథకంలో భాగంగా గతంలో 100 రోజుల పని దినాలను 125 రోజులకు పెంచినట్లు చెప్పారు. ఇదే పథకాన్ని నిన్న తిరుపతి, అన్నమయ్య జిల్లాల్లో ముఖ్యమంత్రి చంద్రబాబు నాయుడు, కేంద్ర గ్రామీణాభివృద్ధి శాఖ మంత్రి ప్రారంభించారు. ఉండి నియోజకవర్గంలోని అన్ని గ్రామాల్లో ఈ పథకం అమలవుతుందని రఘురామకృష్ణరాజు ప్రకటించారు.