పార్టీలకు అతీతంగా శ్రీకాకుళంలో కాపు నేతల సమావేశం; సీట్ల కేటాయింపులో న్యాయం కావాలని డిమాండ్

శ్రీకాకుళం: వివిధ రాజకీయ పార్టీలకు చెందిన తూర్పు కాపు సామాజిక వర్గ నేతలు పార్టీ జెండాలు, అజెండాలను పక్కనపెట్టి శ్రీకాకుళంలో ఆత్మగౌరవ సమావేశం నిర్వహించారు. TDP, YSRCP, BJP నాయకులు ఒకే వేదికపైకి వచ్చి తమ సామాజిక వర్గానికి రాజకీయ ప్రాతినిధ్యం క్షీణిస్తోందన్న ఆవేదన వ్యక్తం చేశారు.

మాజీ మంత్రి బొత్స సత్యనారాయణ (YSRCP) మాట్లాడుతూ, తాను ఇప్పుడు ఉన్న గౌరవానికి కాపు సామాజిక వర్గంలో పుట్టడమే కారణమని చెప్పారు. TDP MLC వేపాడ చిరంజీవి మాట్లాడుతూ, జనసేనాని పవన్ కల్యాణ్ కాపు సామాజిక వర్గానికి చెందిన నిజాయితీ గల నాయకుడని పేర్కొన్నారు. అమరావతి, పోలవరం నిర్మాణ బాధ్యతలను ఇద్దరు కాపు మంత్రుల చేతిలో పెట్టడం వర్గం నిజాయితీకి నిదర్శనమని అన్నారు.

TDP నేత ఆనెపూర్ రామకృష్ణ మాట్లాడుతూ, గతంలో కాపు నేత సీఎం అయ్యే అవకాశం వచ్చినప్పుడు అడ్డుకున్నారని, ఒకసారి కాపు నేత ముఖ్యమంత్రి అయితే శాశ్వతంగా ఉండిపోతారనే భయంతోనే అలా చేశారని ఆరోపించారు. రాబోయే నియోజకవర్గాల పునర్విభజనలో కాపు సామాజిక వర్గానికి తగిన సీట్లు కేటాయించాలని సమావేశం డిమాండ్ చేసింది. అన్యాయం జరిగితే పార్టీలతో సంబంధం లేకుండా ఓడిస్తామని హెచ్చరించింది.