కరీంనగర్ బొమ్మకల్‌లో గాలివాన: కూలీ కుటుంబం ఇల్లు నేలమట్టం

కరీంనగర్ జిల్లా బొమ్మకల్ సమీపంలోని వడ్డర కాలనీలో గురువారం అర్థరాత్రి వచ్చిన గాలివాన ఒక కుటుంబం ఇంటిని పూర్తిగా నేలమట్టం చేసింది. రేకుల ఇల్లు కూలిపోవడంతో కుటుంబంలో ఒక మహిళకు నడుముకు గాయాలయ్యాయి.

రాత్రి 9:30 గంటల సమయంలో అకస్మాత్తుగా వేగంగా వీచిన గాలులకు ఇంటి రేకులు కిలోమీటర్ దూరం వరకు ఎగిరిపోయాయని ఇంటి యజమాని తెలిపారు. ఇంట్లో పడుకున్న మహిళ పిల్లల మీద ఇటుకలు పడకుండా కాపాడేందుకు వారిపై పడుకోగా, ఆమె నడుముకు గాయాలయ్యాయి.

ఈ కుటుంబం కూలి పని చేసి పైసా పైసా పోగేసి రెండు రూమ్ల రేకుల ఇల్లు కట్టుకుందని తెలిసింది. ఇంటి గృహప్రవేశం చేసి నెల రోజులు కూడా కాలేదు. ఇంటికి ₹80,000 ఖర్చుపెట్టి సున్నం కూడా వేసుకున్నారని ఇంటి సభ్యులు చెప్పారు. ఆ మహిళకు భర్త లేడు. ఇద్దరు ఆడపిల్లలు ఉన్నారు.

జిల్లా వ్యాప్తంగా పలు ప్రాంతాల్లో ఇళ్ల పైకప్పులు లేచిపోయినట్లు సమాచారం. నష్టపోయిన కుటుంబం ప్రభుత్వం తమను ఆదుకోవాలని కోరుతోంది. ఈ విషయంపై స్థానిక అధికారుల స్పందన తెలియాల్సి ఉంది.