కరీంనగర్ డ్రంక్ అండ్ డ్రైవ్ స్కాం: రూ.20 లక్షలు వసూలు చేసిన ముగ్గురు ట్రాఫిక్ పోలీసులు సస్పెండ్

కరీంనగర్ లో డ్రంక్ అండ్ డ్రైవ్ కేసుల్లో ట్రాఫిక్ పోలీసులు అక్రమంగా డబ్బు వసూలు చేస్తున్నట్లు ఆరోపణలు వచ్చాయి. 130 కేసుల్లో పోలీసులు రూ.20 లక్షలు వసూలు చేసినట్లు అధికారులు గుర్తించారు. అసలు నిందితుల స్థానంలో ఇతరులను కోర్టుకు హాజరు పరిచినట్లు కూడా ఆరోపణలు ఉన్నాయి.

ఈ కేసులో ప్రాథమిక విచారణ తర్వాత ముగ్గురు ట్రాఫిక్ పోలీసులను ఉన్నతాధికారులు సస్పెండ్ చేశారు. సస్పెండ్ అయిన వారిలో ఆర్ఎస్ఐ శనిగర శ్రీకాంత్, కోర్టు డిస్పోజల్ కేసులు చూసే కానిస్టేబుల్, స్టేషన్ రైటర్ కిరణ్ ఉన్నట్లు తెలిసింది.

డ్రంక్ అండ్ డ్రైవ్ లో పట్టుబడిన వ్యక్తులు సామాజిక పరువు భయంతో డబ్బులు చెల్లించేవారని అధికారులు తెలిపారు. నిందితుల ఆర్థిక స్తోమతను బట్టి ఒక్కొక్కరి నుంచి రూ.20,000 నుంచి రూ.50,000 వరకు వసూలు చేశారని, కొన్ని సందర్భాల్లో లక్ష రూపాయలు కూడా తీసుకున్నట్లు ఆరోపణలు ఉన్నాయి. ఈ డబ్బు చెల్లించిన వారికి బదులుగా ఇతర వ్యక్తులను కోర్టుకు పంపించి కేసులు ముగించినట్లు విచారణలో తేలింది.

సాధారణంగా డ్రంక్ అండ్ డ్రైవ్ కేసుల్లో గరిష్టంగా నెల రోజులు మాత్రమే శిక్ష పడేది. కొందరి కేసుల్లో ఒకే రోజు శిక్ష పడుతుంది. ఈ పరిస్థితిని ఆసరాగా చేసుకుని పోలీసులు నిందితులను మోసం చేసినట్లు అధికారులు భావిస్తున్నారు. ప్రస్తుతం శాఖపరమైన విచారణ జరుగుతోంది. ఈ స్కాం లో మరింత మంది పోలీసుల ప్రమేయం ఉందా అని కూడా దర్యాప్తు చేస్తున్నారు.