కరీంనగర్ హోటల్స్‌లో అపరిశుభ్రత: 3 సీజ్, 4 హోటళ్లకు నోటీసులు

కరీంనగర్ నగరంలోని హోటల్స్, రెస్టారెంట్లపై అధికారులు తనిఖీలు చేపట్టారు. ఐదు రోజుల క్రితం జరిగిన ఈ తనిఖీల్లో పలు చోట్ల అపరిశుభ్రమైన వాతావరణం కనబడింది.

వంటగదులు శుభ్రంగా లేకపోవడం ప్రధాన సమస్యగా బయటపడింది. ఒకే నూనెను పదే పదే మరిగించి వంటకు వాడుతున్నట్టు అధికారులు గుర్తించారు. కొన్ని హోటళ్లలో ఈగలు, దోమలు కూడా కనబడ్డాయి. ఈ తనిఖీల్లో మూడు హోటళ్లను సీజ్ చేశారు. మరో నాలుగు హోటళ్లకు నోటీసులు ఇచ్చారు. ఇందులో పేరు పొందిన పెద్ద హోటళ్లు, రెస్టారెంట్లు కూడా ఉన్నాయి.

రెండు రోజుల క్రితం కరీంనగర్‌లోని ఒక మండి హోటల్‌లో మండి బిర్యానీ తిన్న సుమారు 20 మంది అస్వస్థతకు గురయ్యారు. వారు ఆసుపత్రి పాలయ్యారు.

ఫ్రిజ్‌లో నాలుగు నుంచి ఐదు రోజుల పాటు నిల్వ ఉంచిన ఆహారం తినడం వల్ల జీర్ణ సంబంధిత వ్యాధులు వస్తాయని డాక్టర్లు హెచ్చరిస్తున్నారు. క్యాన్సర్ వంటి వ్యాధుల ప్రమాదం కూడా ఉందని వారు చెప్తున్నారు. కట్ చేసిన అల్లం, వెల్లుల్లి, ఉల్లిపాయలను కూడా ఫ్రిజ్‌లో నాలుగు నుంచి ఐదు రోజుల పాటు నిల్వ చేసి మళ్లీ వాడుతున్నట్టు తనిఖీల్లో తేలింది. మిగిలిపోయిన చికెన్, మటన్ ముక్కలను కూడా ఫ్రిజ్‌లో పెట్టి, మరుసటి రోజు వేడి చేసి కస్టమర్లకు అందిస్తున్నట్టు అధికారులు గుర్తించారు.

వంటగది శుభ్రంగా ఉండాలని, కల్తీ పదార్థాలు వాడకూడదని అధికారులు హోటల్ యాజమాన్యాలను హెచ్చరించారు. నాణ్యమైన ఆహారమే వినియోగదారులకు అందించాలని వారు చెప్పారు. అవసరమైతే క్రిమినల్ కేసులు నమోదు చేస్తామని, పోలీసుల సహకారం తీసుకుంటామని అధికారులు తెలిపారు.