కరీంనగర్ మార్కెట్ యార్డులో రైతుల నిరసన — పంట కొనుగోలు జరగడం లేదని ఆగ్రహం

కరీంనగర్ మార్కెట్ యార్డులో రైతులు నిరసనకు దిగారు. పంట కొనుగోలు జరగడం లేదని ఆగ్రహంతో మార్కెట్ యార్డు ప్రధాన గేటుకు తాళం వేశారు. వాహనాలు లోపలికి రాకుండా అడ్డుకున్నారు.

ప్రధానంగా మక్క, జొన్న రైతులు ఈ నిరసనలో పాల్గొన్నారు. కొందరు రైతులు 20 నుంచి 25 రోజులుగా మార్కెట్ యార్డుకు పంట తీసుకొచ్చి వేచి ఉన్నారు. మార్క్‌ఫెడ్ కొనుగోలు కేంద్రం ఏర్పాటైన 40 రోజులు దాటినా ఒక్క లారీ కూడా నిండుగా లోడ్ చేయలేదని రైతులు చెప్పారు.

రైతులు మాట్లాడుతూ — అధికారులు కొంటామని చెప్తున్నారు కానీ వారం రోజులుగా ఒక్క లారీ కూడా బయటికి వెళ్ళలేదని తెలిపారు. బస్తాలు వేశాక కాంట జరిగినా లారీలు వస్తలేవని సాకులు చెప్తున్నారని ఆరోపించారు. ప్రైవేట్ వ్యాపారులకు సహకరిస్తూ మార్క్‌ఫెడ్ వారు నిర్లక్ష్యంగా వ్యవహరిస్తున్నారని అభియోగం చేశారు.

ఎండలో పంట నష్టపోతోందని రైతులు ఆందోళన వ్యక్తం చేశారు. తేమ శాతం తగ్గిపోవడం వల్ల పంట బరువు తగ్గుతుందని, ఆ నష్టం కూడా తమే భరించాల్సి వస్తోందని చెప్పారు. లారీకి డబ్బులు చెల్లించమని ఒత్తిడి పెడుతున్నారని కూడా ఆరోపించారు.

పంట కొనుగోలు జరిగే వరకు నిరసన కొనసాగుతుందని రైతులు స్పష్టం చేశారు. ఈ విషయంపై మార్క్‌ఫెడ్, జిల్లా అధికారుల అధికారిక స్పందన తెలియాల్సి ఉంది.