నక్సల్ ల్యాండ్‌మైన్‌లో రెండు కళ్లు కోల్పోయిన కరీంనగర్ SI శ్రీనివాస్.. ఇప్పటికీ డ్యూటీలో

కరీంనగర్ కమాండ్ కంట్రోల్ రూమ్‌లో సబ్ ఇన్‌స్పెక్టర్‌గా పని చేస్తున్న శ్రీనివాస్ దాదాపు 30 సంవత్సరాల క్రితం నక్సలైట్ ల్యాండ్‌మైన్ దాడిలో తన రెండు కళ్లను కోల్పోయారు. పూర్తిగా కంటి చూపు పోయినా ఆయన ఇప్పటికీ పోలీస్ విధుల్లో కొనసాగుతున్నారు.

ఆయన 1990లో పోలీస్ కానిస్టేబుల్‌గా ఎంపికయ్యారు. ముల్కనూర్, మంతిని ప్రాంతాల్లో స్పెషల్ పార్టీలో విధులు నిర్వహించారు. ఆ సమయంలో ఆ ప్రాంతంలో నక్సలైట్ ఉద్యమం తీవ్రంగా ఉండేది.

హెడ్ కానిస్టేబుల్‌గా ప్రమోషన్ పొందిన తర్వాత మంతిని ప్రాంతంలో కోంబింగ్ ఆపరేషన్‌కు వెళ్లారు. గుడిమెట్ట గుడ్డ ప్రాంతంలో ఆయన బృందం అంబుష్ చేసింది. అదే సమయంలో నక్సలైట్లు ల్యాండ్‌మైన్ పేల్చారు.

పేలుడు నేరుగా ఆయన ముఖానికి తగిలింది. రెండు కళ్లు అక్కడికక్కడే పోయాయి. ముఖం తీవ్రంగా దెబ్బతినడంతో తొడ నుంచి కండరాలు తీసి ప్లాస్టిక్ సర్జరీ చేశారు.

అప్పటి SP ఉమేశ్ చంద్ర (IPS) వెంటనే ఘటనా స్థలానికి వెళ్లి ఆయన్ని జూబ్లీ హిల్స్ అపోలో హాస్పిటల్‌కు తరలించారు. అక్కడ సుమారు మూడు నెలలు చికిత్స జరిగింది. ఎల్‌వీ ప్రసాద్ ఆస్పత్రిలోనూ చికిత్స చేయించారు. ఆ సమయంలో ఆయనకు పెళ్లయి, ఇద్దరు చిన్న పిల్లలు ఉన్నారు.

ఘటన తర్వాత ఆయనకు కరీంనగర్ కంట్రోల్ రూమ్‌లో పోస్టింగ్ ఇచ్చారు. వరంగల్ రూరల్, రామగుండం కమిషనరేట్‌లలో కూడా పని చేశారు. ప్రస్తుతం కమాండ్ కంట్రోల్ రూమ్‌లో CCTV మానిటరింగ్, బందోబస్తు సమన్వయం చేస్తున్నారు.

ఆయన కుమారుడు, కుమార్తె ఇద్దరూ B.Tech పూర్తి చేసి పెళ్లిళ్లు చేసుకున్నారు. భార్య లావణ్య తనకు బాగా సపోర్ట్ చేస్తున్నారని శ్రీనివాస్ తెలిపారు. హోమ్ గార్డ్ సాయంతో రోజూ ఆఫీసుకు వస్తున్నారు. రోజూ 4-5 కిలోమీటర్లు నడుస్తారు, జిమ్ కూడా చేస్తారు.

ఆయన సర్వీస్‌లో ఇంకా సుమారు మూడున్నర సంవత్సరాలు మిగిలి ఉన్నాయని ఆయన తెలిపారు.