ఈడీ కేసును కొట్టివేసిన కర్ణాటక హైకోర్టు; 'సూపర్ కాప్' కాదని వ్యాఖ్య

కాంగ్రెస్ ఎమ్మెల్యే నంజయ గౌడ, ఆయన అనుచరులపై ఈడీ నమోదు చేసిన ECIR కేసును కర్ణాటక హైకోర్టు కొట్టివేసింది.

కోలార్, చిక్కబళ్లాపూర్ జిల్లాల పాల ఉత్పత్తిదారుల సహకార సంఘాల్లో ఉద్యోగ నియామకాలు, భూముల్లో అక్రమాలు జరిగాయన్న ఆరోపణలపై ఈడీ కేసు నమోదు చేసింది. నవంబర్ 23న మాలూరు ఎమ్మెల్యే నంజయ గౌడ నివాసంపై ఈడీ అధికారులు దాడులు చేశారు. దీంతో ఆయన హైకోర్టును ఆశ్రయించారు.

విచారణ సందర్భంగా PMLA కింద ఈడీ అధికారాలపై కోర్టు స్పష్టత ఇచ్చింది. తన దృష్టికి వచ్చిన ప్రతి విషయాన్ని దర్యాప్తు చేసే సూపర్ కాప్ ఈడీ కాదని హైకోర్టు పేర్కొంది.

ఒక నేరానికి సంబంధించి ప్రాథమిక దర్యాప్తు సంస్థ కేసు నమోదు చేసిన తర్వాత మాత్రమే ఈడీ పాత్ర మొదలవుతుందని కోర్టు తెలిపింది. ఈ కేసులో అలాంటి ప్రాథమిక కేసు లేదని కోర్టు గుర్తించింది. కేవలం మనీ లాండరింగ్ జరిగిందన్న అనుమానం, ఆరోపణల ఆధారంగా ఈడీ సుమోటోగా దర్యాప్తు చేయడం సరికాదని స్పష్టం చేసింది.