బెంగళూరు 5-స్టార్ హోటళ్లలో భారీగా గడువు ముగిసిన మాంసం, కూరగాయలు స్వాధీనం

బెంగళూరులోని ప్రతిష్టాత్మక ఐదు నక్షత్ర హోటళ్లలో కర్నాటక ఆహార భద్రతా విభాగం నిర్వహించిన ఆకస్మిక తనిఖీల్లో 76 కిలోల గడువు ముగిసిన మాంసం, 200 కిలోల కూరగాయలు, 32 లీటర్ల పాడైన పాలు స్వాధీనం చేసుకున్నారు. ది లలిత్, షాంగ్రి-లా, ఫోర్ సీజన్స్, వివాంటా, తాజ్ యశ్వంత్‌పూర్, రైసన్ బ్లూ వంటి ప్రపంచస్థాయి హోటళ్లలో నిల్వ ఉంచిన ఆహార పదార్థాలు వినియోగానికి పనికిరాని స్థితిలో ఉన్నట్లు అధికారులు గుర్తించారు. మొత్తం 26 హోటళ్లను తనిఖీ చేయగా, 35 ఆహార నమూనాలు ల్యాబ్‌కు పంపించారు. వంటగదుల్లో అపరిశుభ్రత, కూరగాయలపై ఫంగస్ పెరుగుదల, ఎఫ్‌ఎస్‌ఎస్‌ఏఐ లేబులింగ్ నిబంధనల ఉల్లంఘన, శాఖాహార-మాంసాహారాలను వేర్వేరుగా నిల్వ చేయకపోవడం వంటి ఉల్లంఘనలు బయటపడ్డాయి. షాంగ్రి-లాలో 15 కిలోలు, ఫోర్ సీజన్స్‌లో 19 కిలోలు, తాజ్ యశ్వంత్‌పూర్‌లో 72 కిలోల చేపలు-మాంసం, రైసన్ బ్లూలో 105 కిలోల గడువు ముగిసిన ఆహారం సీజ్ చేశారు. ల్యాబ్ నివేదికల ఆధారంగా తదుపరి చట్టపరమైన చర్యలు తీసుకుంటామని ఆహార భద్రతా శాఖ కమిషనర్ తెలిపారు. నిందిత హోటళ్లపై భారీ జరిమానాలు, లైసెన్స్ల రద్దు వరకు చర్యలు ఉండొచ్చని అధికార వర్గాలు సూచించాయి.