కర్రెగుట్టలో రూ.40 కోట్లతో రహదారి నిర్మాణం, పర్యాటక అభివృద్ధి

తెలంగాణ-ఛత్తీస్‌గఢ్ సరిహద్దుల్లోని కర్రెగుట్ట ప్రాంతం గతంలో మావోయిస్టులకు కేంద్ర బిందువుగా ఉండేది. ఈ గుట్టలు సుమారు 50 కిలోమీటర్ల పొడవు, 37 కిలోమీటర్ల వెడల్పుతో విస్తరించి ఉన్నాయి.

భద్రతా బలగాలు ‘ఆపరేషన్ బ్లాక్ ఫారెస్ట్’ పేరిట ఈ ప్రాంతాన్ని మావోయిస్టుల నుంచి విముక్తి కలిగించాయి. ఈ ఏడాది జనవరిలో, కర్రెగుట్టల్లోని పామునూరు, తడపల ప్రాంతాల్లో సిఆర్‌పీఎఫ్ బేస్ క్యాంపులను ఏర్పాటు చేసి ‘బ్లాక్ హిల్స్’ పేరుతో అభివృద్ధి కార్యక్రమాలు మొదలుపెట్టారు.

దాదాపు రూ.40 కోట్ల వ్యయంతో బాజేడు మండలం మురుమూరు నుంచి తెలంగాణ సరిహద్దు తడపల వరకు 40 కిలోమీటర్ల మట్టి రహదారి నిర్మాణం పూర్తయింది. అటవీ శాఖ అనుమతులు రాకపోవడంతో సరిహద్దు వద్ద 500 మీటర్ల రహదారి నిర్మాణం నిలిచిపోయింది. ఇంకా ఈ చివరి దశ పూర్తయితే ఛత్తీస్‌గఢ్‌లోని పూజారి కాంకీర్ నుంచి మురుమూరు వరకు నిరాటంకంగా ప్రయాణించవచ్చు.

ప్రస్తుతం రహదారి నిర్మాణ ప్రాంతంలో భద్రతా బలగాలు పహారా కాస్తున్నాయి. వర్షాకాలం తర్వాత వాగులు, వంకలపై వంతెనలు నిర్మించి రోడ్లను మెరుగుపరచనున్నారు. అటవీ శాఖ ఈ ప్రాంతాన్ని పర్యాటక కేంద్రంగా తీర్చిదిద్దేందుకు కొన్ని చోట్ల వ్యూ పాయింట్లు ఏర్పాటు చేయనుంది. ఈ కర్రెగుట్టల్లో సుందరమైన లోయలు, జలపాతాలు ఉన్నాయి.

రహదారి సౌకర్యం కలగడంతో గిరిజనులు ఆనందం వ్యక్తం చేస్తున్నారు. రోడ్డు నిర్మాణం, పర్యాటక అభివృద్ధి పూర్తయితే ఈ మారుమూల ప్రాంతం అభివృద్ధి చెందుతుందని భావిస్తున్నారు.