కాజీపేట రైల్వే కోచ్ ఫ్యాక్టరీ ప్రారంభానికి సిద్ధం: రైల్వే బోర్డు ఛైర్మన్

తెలంగాణలోని కాజీపేటలో ఏర్పాటు చేసిన రైల్వే కోచ్‌ల తయారీ కర్మాగారం ప్రారంభానికి సిద్ధంగా ఉందని రైల్వే బోర్డు ఛైర్మన్ సతీశ్ కుమార్ తెలిపారు.

రైల్వే బోర్డు ఛైర్మన్ హనుమకొండలోని ఈ కోచ్ ఫ్యాక్టరీ నిర్మాణ పనులను అధికారులతో కలసి పరిశీలించారు. సుమారు 100 ఎకరాల్లో ఈ ఫ్యాక్టరీ నిర్మాణం జరిగింది. మరింత భూమి సేకరణ కోసం అధికారులకు సూచనలు చేశారు.

కర్మాగారంలోని మొత్తం మెషినరీ, ప్లాంట్‌లు ఇప్పటికే ఏర్పాటు చేసినట్టు ఆయన వెల్లడించారు. ఉత్పత్తికి సంబంధించిన టెండర్ల ప్రక్రియ కూడా పూర్తయింది. "చెన్నై ICF నుండి కొన్ని కాంపొనెంట్లను తీసుకువచ్చి పెయింటింగ్ చేయించి, ఫ్యాక్టరీని పూర్తి కార్యాచరణలోకి తీసుకురావాలని అధికారులను ఆదేశించాను" అని సతీశ్ కుమార్ వివరించారు.

2023లో ప్రధానమంత్రి శంకుస్థాపన చేసిన ఈ ప్రాజెక్టు ఈ ప్రాంతానికి గర్వకారణంగా ఉంటుందని ఆయన అన్నారు. ఈ కర్మాగారం ప్రారంభంతో ఉపాధి అవకాశాలపై స్పందిస్తూ, ఉత్పత్తి మొదలైన తర్వాతే ఉద్యోగాల పరిస్థితి స్పష్టమవుతుందని తెలిపారు.