నల్గొండ ప్రిన్సిపల్ రూపారెడ్డి హత్య కేసులో ముగ్గురు అదుపులోకి

నల్గొండ జిల్లా కొండమల్లెపల్లిలో నాగార్జున పబ్లిక్ స్కూల్ ప్రిన్సిపల్ కే. రూపారెడ్డి హత్య కేసులో పోలీసులు ముగ్గురు అనుమానితులను అదుపులోకి తీసుకున్నారు. ఈ నెల 11వ తేదీన జేబీ కాలనీలోని ఆమె ఇంట్లో రూపారెడ్డి మృతదేహంగా లభించారు.

పోస్ట్మార్టం, ప్రాథమిక పరిశీలనలో ఆమె శరీరంపై దాదాపు 27 కత్తిపోట్లు ఉన్నట్లు తేలింది. దాడి సమయంలో చేతులకు gloves ధరించడంతో క్రైమ్ సీన్లో వేలిముద్రలు లభించలేదు.

జిల్లా ఎస్పీ ఆదేశాలతో డీఎస్పీ శ్రీనివాసరావు మూడు ప్రత్యేక బృందాలను ఏర్పాటు చేశారు. కాలనీలోని CCTV ఫుటేజీని పోలీసులు పరిశీలించారు. స్కూల్ సిబ్బంది, కుటుంబ సభ్యులు, స్థానికులతో సహా 80 మందికి పైగా వ్యక్తులను విచారించారు.

కాలనీ చివర్లలోని CCTV కెమెరాల్లో 20 నుంచి 25 ఏళ్ల వయసున్న కొందరు యువకులు అనుమానాస్పదంగా సంచరించినట్లు రికార్డైంది. మొబైల్ టవర్ డేటా ఆధారంగా కొండమల్లెపల్లి మండలంలోని రెండు తండాలకు చెందిన యువకులపై అనుమానం బలపడింది. మంగళవారం ఇబ్రహీంపట్నం సమీపంలో ముగ్గురిని పోలీసులు అదుపులోకి తీసుకున్నారు.

పోలీసుల ప్రాథమిక విచారణలో ఈ హత్యలో పాఠశాల పూర్వ విద్యార్థులు, ప్రస్తుతం 10వ తరగతి చదువుతున్న ఒక విద్యార్థి ఉన్నట్లు తెలుస్తోంది. రూపారెడ్డి ఇంటి నుంచి సుమారు రూ. 4 లక్షల నగదు అదృశ్యమైనట్లు గుర్తించారు. దోపిడీ, వ్యక్తిగత కక్ష కోణాల్లో దర్యాప్తు కొనసాగుతోంది. నిందితుల నుంచి ఆయుధాలు, నగదు స్వాధీనం చేసుకునే ప్రక్రియ జరుగుతోంది. పూర్తి వివరాలను పోలీసులు ప్రెస్ మీట్ ద్వారా వెల్లడిస్తారని తెలిపారు.