ముదుమలై టైగర్ రిజర్వ్‌లో కరువు: 10 రోజుల్లో మూడు ఏనుగులు మృతి

తమిళనాడులోని ముదుమలై టైగర్ రిజర్వ్‌ పరిధిలో గత 10 రోజుల్లో మూడు ఏనుగులు మృతి చెందాయి. వర్షాలు లేకపోవడంతో పలు కుంటలు, నీటి గుంటలు పూర్తిగా ఎండిపోయాయి. గడ్డి, ఆకులు ఎండిపోవడంతో వన్యప్రాణులకు ఆహార కొరత ఏర్పడింది.

ఈ నెల 8న మసినగుడి అటవీ రేంజ్‌లో ఒక ఏనుగు మృతి చెందింది. రెండు రోజుల క్రితం సుమారు 50 ఏళ్ల వయసున్న ఓ ఆడ ఏనుగు చనిపోయి కనిపించింది. ఇవాళ మరో ఆడ ఏనుగు కూడా చనిపోయినట్లు గుర్తించారు.

నీటి కొరత, ఆహారం లేకపోవడం వల్లే ఏనుగులు మృతి చెందినట్లు అటవీ అధికారులు అనుమానిస్తున్నారు. ఒకే రిజర్వ్ ఫారెస్ట్‌లో రోజుల వ్యవధిలో మూడు ఏనుగులు వరుసగా మృతి చెందడంపై అటవీ అధికారులు, వన్యప్రాణి ప్రేమికులు ఆందోళన వ్యక్తం చేస్తున్నారు.

పోస్ట్‌మార్టం అనంతరం ఏనుగుల మృతికి గల కారణాలను వెల్లడిస్తామని అధికారులు తెలిపారు.