చెన్నైలో KB సేనా బిజినెస్ కనెక్ట్: రూ.5 కోట్ల ఫండ్ లక్ష్యంగా యువకులకు రుణాలు

చెన్నైలో తెలుగు వ్యాపారవేత్తల సంఘం KB సేనా ఆధ్వర్యంలో శనివారం బిజినెస్ కనెక్ట్ కార్యక్రమం జరిగింది. ఈ సందర్భంగా ప్రైమ్ 9 డైరెక్టర్ కొండా నరేంద్ర మాట్లాడుతూ సంఘం సభ్యులకు సహాయం చేసేందుకు రూ.5 కోట్ల నిధి సేకరణ లక్ష్యం నిర్దేశించినట్లు చెప్పారు.

ఈ నిధి నుంచి యువ పారిశ్రామికవేత్తలకు వడ్డీ లేని రుణాలు ఇవ్వాలని, నిధి నిర్వహణ కోసం రిటైర్డ్, సక్సెస్ఫుల్ వ్యక్తులతో ఒక కమిటీ ఏర్పాటు చేయాలని ఆయన సూచించారు. గత మూడు నెలల్లో రూ.15 లక్షలు సేకరించామని, వచ్చే ఒక సంవత్సరంలో రూ.5 కోట్ల లక్ష్యాన్ని చేరుకోవాలని కార్యకర్తలకు విజ్ఞప్తి చేశారు.

సంఘం సభ్యుల వివరాలు, వారి వ్యాపారాలను డిజిటల్గా నమోదు చేసేందుకు ఒక వెబ్‌సైట్ రూపొందించాలని కొండా నరేంద్ర ప్రతిపాదించారు. గుజరాతీ పటేల్ కమ్యూనిటీ తమ సభ్యులతో హోటల్ వ్యాపారంలో సహకారం చేసుకున్న తీరును, రాజస్థానీలు తెలుగు రాష్ట్రాల్లో తమ సభ్యులకు వడ్డీ లేని రుణాలతో సహాయం చేసిన ఉదాహరణలను ఆయన వివరించారు.

సేవా దృక్పథంతో ముందుకు వెళ్తే తప్పకుండా లక్ష్యాలు చేరుకుంటామని, సంఘం సభ్యులు ఒకరికొకరు కనెక్ట్ అయ్యి సహాయం చేసుకోవాలని పిలుపునిచ్చారు. కార్యక్రమంలో ముత్తువేలు రాజు, రత్నం, మైనాడు ఇతర సంఘ నాయకులు పాల్గొన్నారు.