కేదార్‌నాథ్ ఆలయ తలుపులు మూసివేత.. ఆరు నెలల పాటు ఉకీమఠ్‌లో పూజలు

శీతాకాలం నేపథ్యంలో ఉత్తరాఖండ్‌లోని కేదార్‌నాథ్ ఆలయ తలుపులు బుధవారం ఉదయం 8:30 గంటలకు మూసుకున్నాయి. రాబోయే ఆరు నెలల పాటు ఆలయం మూతపడుతుంది.

గర్భాలయం దక్షిణ ద్వారాన్ని అధికారులు, అర్చకులు సంప్రదాయ పద్ధతిలో మూసివేశారు. తర్వాత పంచముఖి డోలీలో కేదార్‌నాథ్ ఉత్సవ విగ్రహాన్ని తూర్పు ద్వారం నుంచి బయటకు తీశారు. అనంతరం ఆలయ ద్వారాలను మూసివేశారు.

ఈ కార్యక్రమంలో వేలాది మంది భక్తులు పాల్గొన్నారు. సైనిక బ్యాండ్ వాయిద్యాలు, 'హర హర మహాదేవ' నామస్మరణల మధ్య ఉత్సవ విగ్రహాన్ని ఊరేగింపుగా తీసుకెళ్లారు. ఈ విగ్రహాన్ని ఉకీమఠ్‌కు తరలిస్తారు.

తలుపులు మూసే ముందు ప్రత్యేక అభిషేకాలు నిర్వహించారు. లింగాన్ని విభూది, స్థానిక మూలికలు, పూలతో కలిపి సమాధి రూపంలో కప్పారు. గర్భాలయంలో అఖండ జ్యోతిని వెలిగించారు. ఆలయం తిరిగి తెరిచే వరకు ఆ దీపం వెలుగుతూనే ఉంటుందని భక్తుల విశ్వాసం.

రెండు రోజుల ముందు క్షేత్ర పాలకుడు భైరవనాథుడికి ప్రత్యేక పూజలు చేశారు. ఆలయం తిరిగి తెరిచే వరకు భైరవనాథుడే రక్షకుడిగా ఉంటారని విశ్వాసం ఉంది.

సముద్ర మట్టానికి 11,755 అడుగుల ఎత్తులో ఈ ఆలయం ఉంది. ఇప్పటికే భారీ హిమపాతం ప్రారంభమైంది. 10 నుంచి 15 అడుగుల వరకు మంచు పేరుకుపోతుందని అంచనా. ఈ పరిస్థితుల్లో ఆరు నెలల పాటు అక్కడ ఉండటం సాధ్యం కాదు.

ఆరు నెలల తర్వాత, ఏప్రిల్ చివర్లో లేదా మే మొదట్లో అక్షయ తృతీయ సందర్భంగా ఆలయ తలుపులు తిరిగి తెరుస్తారు. ఈ ముహూర్తాన్ని వేద పండితులు నిర్ణయిస్తారు. అప్పటి వరకు ఉకీమఠ్‌లోని ఓంకారేశ్వర్ ఆలయంలో కేదార్‌నాథ్ ఉత్సవ విగ్రహానికి పూజలు జరుగుతాయి.