కేరళలో భారీ వర్షాలు: 10 మంది మృతి, 8 మంది గల్లంతు, 13 మందికి గాయాలు

కేరళలో ఎడతెరిపి లేకుండా కురుస్తున్న భారీ వర్షాల కారణంగా రాష్ట్రంలో వరద పరిస్థితి తీవ్రమైంది. ఇప్పటివరకు 10 మంది మరణించగా, 8 మంది గల్లంతయ్యారు. 13 మందికి పైగా గాయపడ్డారు.

లోతట్టు ప్రాంతాలు జలమయం కావడంతో 5000 మందికి పైగా ప్రజలను సురక్షిత ప్రాంతాలకు తరలించినట్లు అధికారులు తెలిపారు. కొండచరియలు విరిగిపడటంతో పలు రోడ్లు తీవ్రంగా దెబ్బతిన్నాయి. రాకపోకలకు అంతరాయం ఏర్పడింది.

పంబా, అచన్‌కోవిల్ నదులు ఉప్పొంగి ప్రవహిస్తున్నాయి. పజసీ డ్యామ్ వద్ద నీటి మట్టాలు పెరుగుతున్నాయి. ఇడుక్కి, కన్నూర్ జిల్లాల్లో వరద పరిస్థితి విషమంగా ఉంది. కన్నూరులోని ఉల్లిక్కల్ పట్టణంలో నడుము లోతు నీరు నిలిచింది. పంబా నది తీరంలోని పలు గ్రామాలకు బాహ్య ప్రపంచంతో సంబంధాలు తెగిపోయాయి.

కేరళ ముఖ్యమంత్రి పినరయి విజయన్ అధికారులతో సమీక్షించి, ఏ పరిస్థితినైనా ఎదుర్కొనేందుకు సిద్ధంగా ఉండాలని ఆదేశించారు. పర్వత ప్రాంతాలు, లోతట్టు ప్రాంతాల ప్రజలు అప్రమత్తంగా ఉండాలని సూచించారు. పడవల సహాయంతో సహాయక చర్యలు కొనసాగుతున్నాయి. వరద ప్రభావిత ప్రాంతాల నుంచి ప్రజలు బంధువుల ఇళ్లకు, సురక్షిత కేంద్రాలకు తరలివెళుతున్నారు.