కేసినేని సోదరుల వివాదంలో కొత్త మలుపు; నాని ఈడీకి ఫిర్యాదు

విజయవాడ ఎంపి కేసినేని చిన్ని, మాజీ ఎంపి కేసినేని నాని సోదరుల మధ్య రాజకీయ వివాదం మళ్లీ తీవ్రమైంది. నాని తన సోదరుడు చిన్ని, ఆయన కుటుంబ సభ్యులు, వ్యాపార భాగస్వాములపై మనీ లాండరింగ్ నిరోధక చట్టం (PMLA) కింద విచారణ జరపాలని ఎన్‌ఫోర్స్‌మెంట్ డైరెక్టరేట్ (ED) కి లేఖ రాశారు.

2014, 2019 ఎన్నికల్లో తెలుగు దేశం పార్టీ అభ్యర్థిగా విజయవాడ లోక్‌సభ స్థానాన్ని కేసినేని నాని గెలుచుకున్నారు. 2024 ఎన్నికల ముందు ఆయన వైఎస్ఆర్ కాంగ్రెస్ పార్టీలో చేరారు. దీంతో టీడీపీ టికెట్ నాని సోదరుడు కేసినేని చిన్నికి లభించింది. 2024 ఎన్నికల్లో చిన్ని, నానిని ఓడించి ఎంపీగా ఎన్నికయ్యారు. అప్పటి నుంచి ఇద్దరి మధ్య వివాదం కొనసాగుతూనే ఉంది.

గత కొంత కాలంగా సోషల్ మీడియాలో ఇద్దరు ఒకరిపై ఒకరు ఆరోపణలు చేసుకుంటున్నారు. చిన్ని కార్యాలయంలో అక్రమాలు జరుగుతున్నాయని నాని పోస్ట్‌లు పెట్టగా, నానికి సంబంధించిన ట్రావెల్స్, హోటళ్లలో అవకతవకలు ఉన్నాయంటూ చిన్ని వర్గం కౌంటర్ ఇచ్చింది. ఈ నేపథ్యంలో నాని తాజాగా ఈడీకి లేఖ రాయడం వివాదాన్ని మరో మలుపు తిప్పింది.

లిక్కర్ స్కామ్ కేసులో వెలుగులోకి వచ్చిన విషయాలను ప్రస్తావిస్తూ, దర్యాప్తును ప్రభావితం చేసే ప్రయత్నాలు జరుగుతున్నాయని నాని ఆరోపించారు. చిన్నితో పాటు ఆయన కుటుంబ సభ్యులపై సమగ్ర విచారణ చేపట్టాలని కోరారు. స్పందించిన చిన్ని వర్గం, నాని చేస్తున్న ఆరోపణలు నిరాధారమైనవని, ఆయన వ్యక్తిగత పోరు కొనసాగిస్తున్నారని తెలిపింది. ఈడీ లేఖపై ఇంకా స్పందన రాలేదు.