విజయవాడ గుణదల ESI ఆసుపత్రి అప్‌గ్రేడ్‌కు ఎంపీ కేసినేని కృషి

విజయవాడ ఎంపీ కేసినేని చిన్ని కేంద్ర కార్మిక శాఖ మంత్రి మన్సుక్ మాండవియాను కలిసి గుణదల ESI ఆసుపత్రి అప్‌గ్రేడ్ కోసం నివేదిక సమర్పించారు.

1968లో ఏర్పాటైన ఈ ఆసుపత్రి ప్రస్తుతం 110 పడకలతో నడుస్తోంది. ఎన్టీఆర్ కృష్ణ, గుంటూరు, బాపట్ల, పల్నాడు, ప్రకాశం, మార్కాపురం, ఏలూరు జిల్లాల్లోని 2.88 లక్షల మంది బీమా కార్డుదారులకు, కుటుంబంతో సహా 10 లక్షల మందికి సేవలందిస్తోంది. కానీ వైద్యులు, పారామెడికల్ సిబ్బంది కొరత, మౌలిక సదుపాయాలు లేకపోవడంతో రోగులకు ఇబ్బందులు తలెత్తుతున్నాయి.

కేసినేని చిన్ని ఇటీవల ఆసుపత్రిని సందర్శించి లోటుపాట్లను గుర్తించారు. అనంతరం పార్లమెంట్లో సైతం ఈ సమస్య లేవనెత్తారు. తాజాగా మంత్రి మాండవియాను కలిసి 300 పడకలకు విస్తరించాలని, అనుబంధ వైద్య కళాశాల ఏర్పాటుకు కృషి చేయాలని కోరారు. కేంద్రం సానుకూలంగా స్పందించిందని, త్వరలో అనుమతులు లభిస్తాయని ఎంపీ తెలిపారు.

రాష్ట్ర ప్రభుత్వం కూడా డాక్టర్లు, సిబ్బంది నియామకాలకు సానుకూలంగా స్పందించిందని ఆసుపత్రి వర్గాలు తెలిపాయి. అనుమతి రాగానే పనులు ప్రారంభిస్తామని సిబ్బంది చెప్పారు. ప్రస్తుతం ఉన్న కొరతలకు త్వరగా స్టాఫ్ శాంక్షనింగ్ జరిగితే మెరుగైన సేవలు అందించడానికి వీలుంటుందని వారు అభిప్రాయపడ్డారు.