ఖమ్మం జిల్లాలో 46 డిగ్రీల ఉష్ణోగ్రత — Orange Alert జారీ

ఉమ్మడి ఖమ్మం జిల్లాలో ఉష్ణోగ్రతలు 46 డిగ్రీల సెల్సియస్‌కు చేరుకున్నాయి. వాతావరణ శాఖ Orange Alert జారీ చేసింది. రెండు తెలుగు రాష్ట్రాల్లో అత్యధిక ఉష్ణోగ్రతలు ఖమ్మం జిల్లాలోనే నమోదవుతున్నాయి.

ఏజెన్సీ ప్రాంతాల్లో కొత్తగూడెం, దుమ్మగూడెం, చర్ల, వాజేడు, వెంకటాపురంలో 45–46 డిగ్రీలు నమోదయ్యాయి. మైదాన ప్రాంతాల్లో ఏదిలాపురం, బోనగల్, మధిర, ఖమ్మం, కారేపల్లి, కామపల్లిలో 46.5 డిగ్రీల ఉష్ణోగ్రత నమోదైంది. ఉదయం 7 గంటల నుంచి రాత్రి 11 గంటల వరకు వేడిగాలులు తగ్గడం లేదు.

వడదెబ్బతో ఉమ్మడి ఖమ్మం జిల్లాలో ముగ్గురు మరణించినట్లు సమాచారం అందుతోంది. అయితే అధికారులు ఇంకా దీన్ని ధృవీకరించలేదు. డీహైడ్రేషన్ కారణంగా పలువురు ఆసుపత్రిలో చికిత్స పొందుతున్నారు.

భవన నిర్మాణ కార్మికులు, హమాలీలు, taxi డ్రైవర్లు, సింగరేణి కార్మికులు పని అవసరాల రీత్యా రోడ్డెక్కక తప్పడం లేదు. వృద్ధులు, వికలాంగులు, చిన్నారులు అధికంగా ఇబ్బంది పడుతున్నారు.

వైద్య ఆరోగ్య శాఖ అధికారులు ORS, మజ్జిగ, పండ్ల రసాలు తాగాలని సూచిస్తున్నారు. ప్రభుత్వం మరియు వాతావరణ శాఖ అవసరం లేకుండా బయటకు రావద్దని హెచ్చరికలు జారీ చేశాయి.

రోహిణి కార్తె మరో నాలుగు రోజుల్లో ప్రారంభం కానుంది. అంతకు ముందే ఈ స్థాయి వేడి నమోదు కావడం ఆందోళన కలిగిస్తోంది. ముందస్తుగా వర్షాలు పడితే ఎండ తీవ్రత తగ్గే అవకాశం ఉందని వాతావరణ శాఖ తెలిపింది.