ఖమ్మం: భార్య మీద ఇన్సూరెన్స్ క్లెయిమ్ కోసం హత్య చేసినట్లు అనుమానం — నిందితుడు పరారీ

ఖమ్మం జిల్లా తిరుమలాయపాలెం మండలం గోల్తండాకు చెందిన శివాజీ అనే వ్యక్తి తన భార్య మీనాక్షిని హత్య చేసినట్లు పోలీసులు అనుమానిస్తున్నారు. మీనాక్షి పేరు మీద కోటి రూపాయల ఇన్సూరెన్స్ పాలసీ ఉంది.

ఇల్లు నిర్మించడానికి శివాజీ బ్యాంకులో ₹80 లక్షలకు పైగా రుణం తీసుకున్నాడు. ఆ అప్పులు తీర్చేందుకు భార్య మరణిస్తే వచ్చే ఇన్సూరెన్స్ డబ్బులను వాడుకోవాలని పథకం వేసినట్లు కుటుంబ సభ్యులు ఆరోపిస్తున్నారు.

శివాజీ, మీనాక్షిల వివాహమై 14 సంవత్సరాలు అయింది. వారికి ఇద్దరు కుమారులు ఉన్నారు. గత కొంత కాలంగా ఇద్దరి మధ్య ఆర్థిక వివాదాలు జరుగుతున్నట్లు సమాచారం.

మీనాక్షి ఉరివేసుకుందని శివాజీ బంధువులకు చెప్పే ప్రయత్నం చేశాడు. అయితే ఆమె శరీరంపై గాయాలు చూసిన కుటుంబ సభ్యులకు అనుమానం కలిగింది. గతంలో శివాజీ మీనాక్షిని హింసించినట్లు చూపే దృశ్యాలు ఉన్నాయని బంధువులు పేర్కొంటున్నారు.

కుటుంబ సభ్యుల ఫిర్యాదు మేరకు పోలీసులు కేసు నమోదు చేశారు. ఇన్సూరెన్స్ మాత్రమే కారణమా, వేరే కారణాలు కూడా ఉన్నాయా అనే కోణంలో విచారణ జరుపుతున్నారు. ప్రస్తుతం శివాజీ పరారీలో ఉన్నాడు.