మంచాన పడిన కూతురు కోసం ఒంటరిగా పోరాడుతున్న ఖమ్మం తల్లి

ఖమ్మం నగరానికి చెందిన ధనలక్ష్మి తన 13 ఏళ్ల కూతురు జననిని ఒంటరిగా సాకుతోంది. జనని పుట్టినప్పుడు ఆరోగ్యంగా ఉంది. నాలుగేళ్ల వయసులో ఫిట్స్ వచ్చి ఆమె ఆరోగ్యం క్షీణించింది. ఇప్పుడు ఆ బాలిక కాళ్ళు చేతులు కదపలేని స్థితిలో మంచానికే పరిమితమైంది.

ఖమ్మం, హైదరాబాద్, బెంగళూరులోని పలు ఆసుపత్రుల్లో చికిత్స చేయించారు. బెంగళూరు వైద్యులు తలలో గడ్డ పెరుగుతోందని, శస్త్రచికిత్స చేస్తే ప్రాణహాని ఉందని తెలిపారు. నరాలు గడ్డకి చుట్టుకొని ఉన్నాయని ఆపరేషన్ రిస్క్‌తో కూడుకున్నదని వైద్యులు చెప్పారు. ఆపరేషన్ వద్దని తల్లి నిర్ణయించి బాలికను ఇంటికి తీసుకొచ్చింది.

జనని తండ్రి సుమారు ఏడు ఎనిమిది సంవత్సరాల క్రితం కుటుంబాన్ని వదిలివెళ్ళాడు. భర్త వదిలివెళ్ళాడని రుజువు ఉన్నా, ధనలక్ష్మికి ఒంటరి మహిళ పించన్ మంజూరు కాలేదు. కూతురికి వచ్చే ₹4,000 దివ్యాంగ పించన్‌తోనే తల్లీకూతుళ్ళు జీవిస్తున్నారు.

ప్రభుత్వం ఇచ్చిన double bedroom ఇల్లు మూడో అంతస్తులో ఉంది. పెద్దగా అయిన బాలికను కిందకి పైకి మోయడం ధనలక్ష్మికి కష్టంగా మారింది. వీపు నొప్పులు కూడా వస్తున్నాయని ఆమె తెలిపింది. బాలికకు ఎప్పుడు ఫిట్స్ వస్తాయో తెలియదు కాబట్టి 24 గంటలు పక్కన ఉండాలని, బయటికి వెళ్ళి పని చేయలేని పరిస్థితిలో ఉన్నానని ధనలక్ష్మి చెప్పింది.

మందులు, డైపర్లు, ఇతర ఖర్చులకు ₹4,000 సరిపోవడం లేదని ఆమె తెలిపింది. తమకు గ్రౌండ్ ఫ్లోర్ ఇల్లు కేటాయించాలని, ఆర్థిక సహాయం చేయాలని ధనలక్ష్మి విజ్ఞప్తి చేసింది.