ఖమ్మంలో రైతు వేదికల్లో విత్తన మేళా: నాణ్యమైన విత్తనాలు, ఎరువులు అందుబాటులో

తెలంగాణలోని ఖమ్మం జిల్లాలో రైతు వేదికల్లో విత్తనాల మేళా నిర్వహిస్తున్నారు. రైతులకు వారి గ్రామాల వద్దే నాణ్యమైన విత్తనాలు, ఎరువులు అందించడం ఈ మేళా ముఖ్య ఉద్దేశం. జిల్లాలోని మొత్తం 129 రైతు వేదికల్లో ఈ కార్యక్రమం కొనసాగుతోంది. వీటిలో 38 రైతు వేదికల్లో నానో యూరియా, నానో డీఏపీ వంటి ఎరువుల విక్రయం కూడా ప్రారంభమైంది.

ఈ మేళాలో BPT 5204, RNR 15048, HMT సోనా, జై శ్రీరామ్, KNM 7715, WGL 44 వంటి సన్నరకం వరి విత్తనాలతో పాటు కంది, పెసర, మినుము, వేరుశెనగ, నువ్వులు వంటి పప్పుధాన్యాలు, నూనె గింజలు, కూరగాయల విత్తనాలు కూడా అందుబాటులో ఉన్నాయి. కృషి విజ్ఞాన కేంద్రం, తెలంగాణ సీడ్ డెవలప్మెంట్ కార్పొరేషన్, స్థానిక డీలర్ల సహకారంతో ఈ స్టాల్స్ ఏర్పాటు చేశారు.

రైతుల అవసరాలకు అనుగుణంగా విత్తనాల ఎంపికపై అధికారులు అవగాహన కల్పిస్తున్నారు. వాతావరణం, నేల స్వరూపాన్ని బట్టి ఏ విత్తనాలు వేయాలో సూచిస్తున్నారు. వ్యవసాయ అధికారులు మాట్లాడుతూ, 'రైతులకు సన్నరకం వరి విత్తనాలు, పప్పుధాన్యాలు అందుబాటులోకి తీసుకురావడమే లక్ష్యం' అని తెలిపారు. మేళా వారం రోజుల పాటు కొనసాగుతుందని, మిగతా రైతు వేదికల్లోనూ త్వరలోనే ప్రారంభిస్తామని చెప్పారు.

ఒక్కో రైతు వేదికలో ఏర్పాటైన స్టాల్స్‌ను రైతులు స్వయంగా సందర్శించి కొనుగోలు చేస్తున్నారు. ఒక రైతు మాట్లాడుతూ, 'రైతు వేదికలో ఏడు, ఎనిమిది రకాల విత్తనాలు ఇస్తున్నారు. నాకు BPT రకం తీసుకున్నాను. సన్న రకాలకు బోనస్ వస్తుంది. ఇక్కడే అన్నీ దొరకడం వల్ల దూర ప్రాంతాలకు వెళ్లాల్సిన అవసరం తగ్గింది' అని సంతృప్తి వ్యక్తం చేశారు.

రైతు వేదికల ద్వారా రైతు భరోసా, రైతు బీమా, యంత్ర పరికరాల సబ్సిడీ వంటి ఇతర వ్యవసాయ సేవలు కూడా అందుబాటులో ఉంచుతున్నారు. రైతులు ఈ అవకాశాన్ని సద్వినియోగం చేసుకోవాలని అధికారులు సూచిస్తున్నారు.