ఖమ్మంలో సోనో విజన్ షోరూమ్‌లో 160కి పైగా ఫోన్లు, 20 ఐఫోన్లు చోరీ

ఖమ్మం నగరంలోని వైరా రోడ్డులో ఉన్న సోనో విజన్ షోరూమ్‌లో తెల్లవారుజామున భారీ చోరీ జరిగింది. దొంగలు షట్టర్ తాళాలు పగలగొట్టి సీసీ కెమెరాల కేబుళ్లు కట్ చేసి లోపలికి ప్రవేశించారు. షోరూమ్ మేనేజర్ ప్రకారం, 160కు పైగా ఫోన్లు చోరీకి గురయ్యాయి. ఇందులో 20కి పైగా ఐఫోన్లు ఉన్నాయి. చోరీ అయిన ఫోన్ల విలువ సుమారు రూ.70 లక్షలు అని అంచనా.

పోలీసుల వివరాల ప్రకారం, దుండగులు ఏపీ 20 నంబర్ ప్లేట్ కలిగిన కారులో వచ్చారు. ఈ నంబర్ విజయవాడ పరిసర ప్రాంతానికి చెందినది. తెల్లవారుజామున 3 గంటల సమయంలో చోరీ జరిగింది. షోరూమ్‌కు నిన్ననే ఫోన్ల స్టాక్ వచ్చింది. చోరీకి ముందు సీసీ కెమెరాల నెట్‌వర్క్ కట్ చేసినట్లు తెలిసింది. షోరూమ్‌లో టీవీలు, ఫ్రిజ్‌లు వంటి ఇతర వస్తువులు ఉన్నప్పటికీ, దొంగలు కేవలం ఫోన్లనే లక్ష్యంగా చేసుకున్నారు.

ఈ షోరూమ్ టూ టౌన్ పోలీస్ స్టేషన్, ASP కార్యాలయానికి కేవలం 500 మీటర్ల దూరంలోనే ఉంది. చోరీ జరుగుతున్న సమయంలో కంపెనీ అధికారులు అప్రమత్తం చేయడంతో మేనేజర్ ఘటనా స్థలానికి చేరుకున్నారు. కానీ, ఆ సమయంలో దుండగులు మేనేజర్ స్కూటర్‌ను ఢీకొట్టి కారుతో పారిపోయారు. సంఘటనా స్థలాన్ని CP సునీల్ దత్, ASP రమణమూర్తిలతో కూడిన పోలీస్ బృందం పరిశీలించింది. ఈ చోరీపై దర్యాప్తు కొనసాగుతోంది.