ఖరీఫ్ వరిలో తొలిదశ కలుపు, ఎరువుల యాజమాన్యంపై శాస్త్రవేత్త సూచనలు

ఖరీఫ్ వరి సాగు ప్రస్తుతం వివిధ దశల్లో ఉంది. రెండు తెలుగు రాష్ట్రాల్లో రైతులు నారుమడుల నుండి ప్రధాన పొలంలో నాట్లు వేస్తున్నారు. అధిక దిగుబడి కోసం తొలిదశ కలుపు, ఎరువుల యాజమాన్యం చాలా ముఖ్యమని వరంగల్ ప్రాంతీయ వ్యవసాయ పరిశోధన స్థానం శాస్త్రవేత్త మాధవి తెలిపారు.

కలుపు నివారణలో భాగంగా, నాట్లు పూర్తయిన మూడు నుండి ఐదు రోజుల లోపు బ్యూటాక్లోర్ లీటరు నుండి లీటరున్నర, లేదా ప్రెటిలాక్లోర్ 600 నుండి 800 ఎంఎల్ ఎకరానికి ఉపయోగించాలి. గడువు తప్పితే, ఎనిమిది నుండి పది రోజుల లోపు బెన్సల్ప్యూరాన్ మిథైల్ + ప్రెటిలాక్లోర్ గ్రాన్యూల్స్ 4 కేజీలు, లేదా ప్రెటిలాక్లోర్ + పరోజోసల్ఫ్యూరాన్ ఇథైల్ 4 కేజీలు 20 కేజీల ఇసుకలో కలిపి బురదలో చల్లాలి. 15 నుండి 20 రోజుల తరువాత కలుపు ఉంటే, ట్రయోఫామ్ + ఇతాక్సిసల్ఫిరాన్ 90 గ్రాములు 200 లీటర్ల నీటిలో, లేదా ఫెనాక్సిలం + సహలోఫాబ్ బ్యూటైల్ 800 ఎంఎల్ 200 లీటర్ల నీటిలో కలిపి పిచికారి చేయాలి.

ఎరువుల నిర్వహణలో, ఎకరానికి 48 కేజీల నత్రజని, 24 కేజీల భాస్వరం, 16 కేజీల పొటాష్ అందించే ఎరువులు అవసరం. ఆఖరి దుక్కిలో డీఏపీ ఒక బస్తా, 15 కేజీల యూరియా, 13 కేజీల మ్యూరేట్ ఆఫ్ పొటాష్ వేయాలి. భాస్వరం మొత్తాన్ని భూమిలోనే వేయాలి, పైపాటిగా వేయకూడదు. యూరియాను మూడు భాగాలుగా చేసి, అడుగు, పిలక, చిరుపొట్ట దశలలో ఇవ్వాలి. నల్లరేగడి నేలల్లో భాస్వరం 26 కేజీలు ఒకేసారి ఆఖరి దుక్కిలో, ఎర్ర నేలల్లో 13 కేజీలు ఆఖరి దుక్కిలో, మిగతా 13 కేజీలు చిరుపొట్ట దశలో వేయాలి. నీమ్ కోటెడ్ యూరియా వాడాలని, సంక్లిష్ట ఎరువులు ఎల్లప్పుడూ బురదలోనే ఇవ్వాలని, వేసిన 24 గంటల వరకు నీరు పెట్టవద్దని సూచించారు. చీడపీడలను నియంత్రించడానికి పొటాష్ ఎరువు సరిగ్గా ఇవ్వాలన్నారు.