జులై 16న గోల్కొండలో బోనాల జాతర ప్రారంభం : మంత్రి కొండా సురేఖ

దేవాదాయ శాఖ మంత్రి కొండా సురేఖ జూలై 16న గోల్కొండలోని జగదాంబ మహంకాళి ఆలయంలో బోనాల జాతర ప్రారంభమవుతుందని తెలిపారు. ఈ మేరకు ఆమె సోమవారం అధికారులతో సమీక్ష నిర్వహించారు.

సమావేశంలో మాట్లాడిన మంత్రి, ఉదయం 10:30 గంటలకు జాతరను ఘనంగా ప్రారంభించనున్నట్లు చెప్పారు. గత సంవత్సరం ప్రభుత్వం 10 కోట్ల రూపాయలు కేటాయించగా, ఈ సారి భక్తుల రాకపోకలు పెరుగుతాయని అంచనా వేస్తూ 20 కోట్ల రూపాయలు కేటాయింపు కోసం దేవాదాయ శాఖ తరఫున విజ్ఞప్తి చేస్తామన్నారు.

భక్తులకు అసౌకర్యం కలగకుండా అధికారులు పటిష్టమైన ఏర్పాట్లు చేయాలని ఆమె సూచించారు. మహిళలు పెద్ద సంఖ్యలో వస్తారు కాబట్టి మహిళా పోలీసులను అధికంగా నియమించాలని, ఉచిత బస్సుల వంటి సౌకర్యాలు కల్పించాలని తెలిపారు. సాంస్కృతిక కార్యక్రమాలు కూడా పెద్ద ఎత్తున నిర్వహించాలని చెప్పారు.

ఈసారి మూడు కార్పొరేషన్ల నుంచి ముగ్గురు అధికారుల చొప్పున విధులకు హాజరవుతున్న నేపథ్యంలో బాధ్యతాయుతంగా పనిచేయాలని మంత్రి సూచించారు. ఆమె వ్యక్తిగతంగా హాజరుకాలేకపోయినా జూమ్ ద్వారా సమావేశంలో పాల్గొన్నారు.

బోనాలు తెలంగాణ రాష్ట్ర ప్రధాన పండుగ. లక్షలాది మంది భక్తులు గోల్కొండకు తరలివస్తారు.